Read Biete LAPUI 144 Bible Online

LAPUI 144 - Biete bible

LAPUI 144

¹Davida inpâkna lâ PUMAPA, ki lungpui chu inpâkin om riseh. Ani khan ki kuthei hi râlkâp dân ân risei a; Ridoi dân a nen risei thiam tâk a.

²Ani chu ki kulpui neh ki saninzôkna, Ki kulbing risâng tak neh ki zôkna, Ke pho, ki iamna ringatna, Mihei[73] ki nuaia inkhûn ngaitu chu a nit.

³O PUMAPA, miriam hi im a nita nî riat mai ngai? Miriam naipa khom im a nita nî ngaitua ngai hi?

⁴Miriam hi chanlamboi angkah a nit a; A damsung sûnhei hi rilîm itlân angkah hi a nit.

⁵O PUMAPA, rivân iongin zuang ṭum inla; Itlânghei chu tôn inla, a khû suak zut zut riseh.

⁶Khothlâr inrilek inla, ke râlhei chu chekindar roh; Ni thalhei chu kâp suak inla, annihei chu lâizâm intho roh.

⁷Chungtianga rithokin ni kutin ne zuk iban inla, Tui ilianhei ata ne kâiisuan la, ne sanisua roh; Nam dang mihei thuneina ata hi ne saninzôk roh.

⁸An bâi khan milak a rila, Vâni risâm pum khomin milak an tho ngai.

⁹O Pathian, nangma chôiinrisângin la thar sak ki ta; Perkhuang rui sômka nei neh nangmah inpâkin zâi ki ti.

¹⁰Rênghei ziangah nêna ni pêk a, Ni bôi Davida chu khandai ingaih ata ni sanisua tâk a.

¹¹Ke râlhei ata chu ne sanisuan la; Nam danghei kut ata ne saninzôk roh; An bâi khan milak a ril a, Vâni risâm pum khomin milak an tho ngai.

¹²Thing ithuar rum angkan kin naihei chu vâng rum sela; Kin nainuhei khom rêng ina â kil chopui enihoi angkan ni riseh.

¹³Kin fasiarhei bu neh bâlin hong sip sela; Phûla kin berahei khom a sâng a sîngin hong pung riseh.

¹⁴Kin mîringhei khom hong pung sela; Changrisam manih, ân rimangtu manih om no riseh. Kin kot tualah khom lungzîng khêk rôl om no riseh.

¹⁵A nit, khangkana ṭhatvurna dong namhei chu an ham a ṭhat e; PUMAPA Pathiana nei mihei chu an ham ai ṭhat a nit.