Read Biete LAPUI 145 Bible Online

LAPUI 145 - Biete bible

LAPUI 145

¹Davida iphua Inpâkna lâ O PUMAPA, ki Pathian, nang chôiinrisâng ki ta, Nangma riming hi kumkhuantluangkan inpâk ki ti.

²Nîn tin nang inpâk ki ta, Ner ming hi kumkhuantluangin inpâk ki ti.

³PUMAPA chu a roinpuia, Roinpui takka inpâk rang a nit; A roinpuizia chu suisua rual ni mak e.

⁴Ni sinthohei chu rikhûk tin tinin inpâk mai an ta; Ni sintho roinpui takhei chu inpuang mai an ti.

⁵Ni roinpuizia neh nen thangzia chu ril an ta, Ni sinrikhêl thohei chu ngaituang ki ti.

⁶Mihein ni sinthotheizia chu ril an ta, Kei khomin ni roinpuizia inpuang ki ti.

⁷Ni ṭhatna roinpui takhei chu ril an ta, Ni felna thu hi râiifân takkan lan sak an ti.

⁸PUMAPA chu mi lunginkham thei tak, ṭhatnaa sip, Lungrivuai tak, lungkhamlianna nei a nit.

⁹PUMAPA chu mi tin chungah a ṭhat a, A lungkhamna chu a thilsiam murdi chungah a om ngai.

¹⁰O PUMAPA, ni thilsiam murdi khan nang chôiinrisâng an ta, Ni mi rithianghei khomin nang inpâk an ti.

¹¹Ni ram roinpuizia thu ril an ta, Ni sinthotheizia thu khom isîr an ti.

¹²Khanchu, mi tinrêngin ni sintho roinpui takhei neh, Ni ram enhoi roinpuizia chu riang an ti.

¹³Ni ram chu kumtluang ram rang a nit a, Ni thuneina chu suanpâr murdi dênin om mai a ti. PUMAPA chu a ṭonginkungah iiam a om a, A sintho murdiah lungkham a nei ngai.

¹⁴PUMAPA khan â lîrhei a kâi ithoi ngai a; Beidonga khûn ṭianhei khom ân har nôk ngai.

¹⁵Ni thilsiam murdi mithei khan nang a thlîr mai a, Nangman a zoro takah an fâk rang ni pêk ngai.

¹⁶Ni kut ner sam a, Mîring murdi chu ne fân khop ngai.

¹⁷PUMAPA chu a thiltho murdiah a fel a, A sintho murdiah mi lunginkham thei tak a nit.

¹⁸Ama koituhei chu PUMAPA khan a nâi ngai a, Tititaka ama koituhei ziangah khan.

¹⁹Ama ṭituhei lungdo chu lo ân tluk pêk ngai a, An ikhêk irî chu a riat a, anni chu a saninzôk ngai.

²⁰PUMAPA khan ama lungithlunghei murdi chu iṭha takkan a donsui ngai a; Mi siahei rêk chu inrimang riai a ti.

²¹Ki bâi hin PUMAPA inpâkna thu ril mai a ta, Khante, a thilsiam rithuak inei murdîn, Arming rithiang chu kumkhuantluangkan inpâk riseh.