Read Biete LAPUI 147 Bible Online

LAPUI 147 - Biete bible

LAPUI 147

¹PUMAPA chu inpâk rei. Ei Pathian inpâka zâi hi â ṭha tak a nit; Ani chu a ṭhat a, inpâk rua pial a nit.

²PUMAPA khan Jerusalem chu ân ding nôk a; Israel mi, chekindara omhei chu a ṭhui bûm nôk a.

³Ilung ikoihei chu ân dam a, An popnahei chu a tuam pêk ngai.

⁴Ârsi tam rang zâk ân kung a; An riming a be chit a.

⁵Ei PUMAPA hi a roinpuia, sinithothei tak a nit; A vârna khan mongna zel nei mak e.

⁶PUMAPA khan ringaiichînhei a chôiinrisâng a, Mi siahei chu rinêngah a sirpol ngai.

⁷Lôm lâ sakin PUMAPA chôiinrisâng unla; Seranda neh ei Pathian inpâkin zâi rei.

⁸Ani khan rivân khi sûm ân rili a; Rinêngah rua ân sûr ngai a; Itlângheiah khan loisûl ân ṭoi ngai.

⁹Ramsahei ifah rang a pêk ngai a, Vaâkte voniṭâmhei khom â fa ngai.

¹⁰Sakor râtna ringai inlu mak a, Râlpahei râtna khom ringai inlu ual ngai mak.

¹¹Nikhomseh, ama ṭituhei chungah khan lômna a nei ngai a, A lungkhamliannaa ringattuhei chungah khan a lôm ngai.

¹²O Jerusalem, PUMAPA chu inpâk roh. O Zion, ni Pathian chu inpâk roh.

¹³Ani khan ni kul inkhârhei ân det a; Ni sunga om ni naihei chu ṭhat a vur a.

¹⁴Ni ramrîheiah râlringamna ân lêng a, Bu tui tak chi ni nuam dôrkah nang ai pêk ngai a nit.

¹⁵A thupêk chu rinêng chungah ân puang a, A thu sîr chu irang takkan a tho ngai.

¹⁶Puan ngoi iphoi angkah takin ivur â ṭhul pêk a, Meirivâm ivuang angkan ivur kha a îṭhûl ngai a nit.

¹⁷Lungchirit angkan irial kha â ṭhul pêk ngai a; A dâizia chu tûm â tuang zoi thei rang?

¹⁸Khanungchu, thu a pêk a, ivur kha a zôi a; Â thli ân râng a; khanchu, tuihei a hong luang ngai a.

¹⁹A thu chu Jakobhei ziangah ân puang a, A dân neh a thurêlhei chu Israelhei ân riat a.

²⁰Khahei kha nam danghei ranga ai tho ni tlak mak a, A dânhei khom îte an iriat ual ino a nit. PUMAPA chu inpâk rei.