Read Biete LAPUI 148 Bible Online

LAPUI 148 - Biete bible

LAPUI 148

¹PUMAPA chu inpâk rei. Rivâna rithokin PUMAPA chu inpâk unla, Chungtiangheiah khin amah chu inpâk rei.

²O, a vântirtônhei, amah chu inpâk unla, A vân mi murdihei o, amah chu inpâk rei.

³Inî neh ithla hei o, amah chu inpâk unla; Ârsi vâr murdihei o, amah chu inpâk rei.

⁴Rivân risânghei o, amah chu inpâk unla, Rivân chunga tuihei o,[74] amah chu inpâk rei.

⁵Khahei murdi khan PUMAPA riming chu inpâk riseh; Ani khan thu a pêk a, isiamin an hong om tâk a.

⁶Ani khan khahei khah kumkhuantluanga rangin ân det a, Thu â boi thei khâi ino rang chu ân kung a.[75]

⁷Tuikhanglian neh a sunga om mîring inrît murdihei o; Rinênga rithokin PUMAPA chu inpâk rei.

⁸Mei neh irial hei, ivur neh sûm hei o, A thu zôm ngai thlipuihei o, PUMAPA chu inpâk rei.

⁹Tlâng ilian neh tlâng ichîn murdihei o, Thei kung neh sidar thing murdihei o, Amah chu inpâk unla;

¹⁰Ramsahei neh insungsa murdihei o, Mîring neh chungavuang ivahei o, Amah chu inpâk rei.

¹¹Rinêng rênghei neh mi tinrênghei o, Mi lianhei neh rinênga roirêltu murdihei o, Amah chu inpâk rei.

¹²Nungâk neh tlangvâlhei o, Itar neh naipanghei o, Amah chu inpâk rei.

¹³Khahei murdi khan PUMAPA riming chu inpâk riseh. Riming dang dang nêkan ama riming hi a roinpui ual a, A roinpuina khan rinêng neh rivân ai khûm a nit.

¹⁴A mihei chu râtnan ân rithluk a, Khanchu, a mihei murdi khan an inpâkna rangin, A mi Israelhei, a lungdihei ngêi khan. PUMAPA chu inpâk rei.