Read Biete LAPUI 18 Bible Online

LAPUI 18 - Biete bible

LAPUI 18

¹O PUMAPA, lung nang ki thlung vang na! Nang chu ki râtna ni nit.

²PUMAPA chu ki kulpui a nit a; Ani chu ki kulpui idet tak a nit. Ki Pathian chu ki hoi theina a nit a, Amah neh chu izôkriamkan [7] ki om thei. Ani khan ipho angkan a ne hoi a, Ne rungin a nen zôk riam ngai.

³PUMAPA chu ke sam a, Ani khan ke râlhei kuta rithokin a ne saninzôk ngai. PUMAPA chu inpâkin om riseh.

⁴Thina ruirualhei khan a ne zêm a; Buainahein tuilian angkan a ne chîm a.

⁵A nit, thina inrîtin a ne hualvêl a, Thlân bâi inruakin a ne ingâk ṭian a nit.

⁶Ki lungzîng lâiin PUMAPA chu ke sam a; Ki Pathian chu ne ṭangpui rangin ki koi a. Ani khan a Biak Ina rithokin ki rôl a riat a; Ne ṭangpui ranga ke khêk irî a lei riat tâk.

⁷Khanchu, rinêng â nîng a, ân thing tâk a; Pathian ning a thik sikin itlânghei khom arngatna dênin arsoi a, ân thing tâk a.

⁸A nâra rithokin meikhû a suak zut zut a, A bâia rithokin meichok neh mei ri-al a suak a.

⁹Ani khan rivân a thlêr a, a zuang ṭum tâk a, A ke nuaiah sûm izîng ngut a om a.

¹⁰Mîring rithla nei chunga chuangin a vuang a; A nit, ithli rithlaheiah a vuang duai duai a.

¹¹Ani chu izîng richel takah amah neh amah rikhûn a om a; Sûm isa tak tuia sip khan a hualvêl a.

¹²A makunga ivâr ri-ela rithokin irial neh mei a zuang sûr chur chur a; Sûm isâtakhei kha a zuang len a.

¹³Khanchu, PUMAPA kha rivâna rithokin â rî dur dur a; Ân chungtaka rôl irî chu ân thang tâk a.

¹⁴Ani khan a thalhei a kâp suak a, Â râlhei â chekindar chit a; Khothlârhei ân rilek a, lâizâm an tho zoi tâk a.

¹⁵PUMAPA, ne râlhei chu ni ngo a, Anni kha ningmurin ni râiin chu, Tuikhanglian ilî ṭuang khom â lang a, Rinêng ringatna khom â nîng riai ngai a.

¹⁶PUMAPA khan chungtianga rithokin a ne zuk iban a, a ne tûk tâk a; Tui inthûk takheia rithokin a ne kâiisua tâk.

¹⁷Ne doitu rât takheia rithokin a ne saninzôk tâk a; A nit, ne neltuheia rithok khomin, Anni chu ki rangin an irât rai a nit.

¹⁸Anni khan ki lungzîng lâiin an ne doi a; Nikhomsela, PUMAPA chu ki rinpui tak a nit.

¹⁹Ani khan ṭiomah[8] a ne ṭangpui a; Ki chungah a lôm sikin a ne saninzôk tâk a.

²⁰PUMAPA khan ki fel tlia angkah takin ki chungah a sin a; Ki kuthei rithiang lam angkah takin ṭhat a ne ivur a nit.

²¹PUMAPA dân chu ki zôm ngit a; Ki Pathian zianga rithokin isual takkan pêt rimang ngai mang e.

²²A dân murdihei ki vong a; A thupêkhei chu zôm loiin om ngai mang e.

²³Ani khan sêlnaboi ki nit zia neh thonsual loi ranga ker dîn zia a riat a.

²⁴Khasikin, ki fel tlia angkah takin a ne thung a, Ki kuthei a mitmuah arthiang lam angkah takin.

²⁵O PUMAPA, nang chu mi iamomhei chungah ni iamom a;[9] Mi ṭha rikiphei chungah ni ṭhat rikip ngai a.

²⁶Mi rithianghei chungah ner thiang a; Nikhomseh, mi siahei chungah chu kuttum ne lek ngai.

²⁷Mi tlômhei chu ni saninzôk ngai a, Nikhomseh, mi lârripâkhei chu nen tlôm ngai.

²⁸O PUMAPA, nangman ivâr ne pen la, Keimaa izîng hih nen rikiang pêk roh.

²⁹A nit, ke râlhei rûn theina rang râtna ne pen la; An kulpui lîm theina rang ritha neh khan.

³⁰Pathian chu a sinthoheiah a ṭhat rikip vang na! A thuhei chu ringat tlâk a nit a, Amah-a iamna ringat murdihei ta rangin ani chu ipho angkah a nit.

³¹PUMAPA bang hih Pathian a nit a; Amah bang hih ei lungpui ribîkna a nit.

³²Ani chu râtnaa nen rithluktu neh, Ki lampui ner thial infâi pêktu Pathian a nit.

³³Ani khan ki ke hih sazuk ke angkan a siam a; Itlângheiah izôkriamkan a nen lêng ngai a.

³⁴Râl buala rangin risual dân a nen risei a, Khanchu, phel ikhir takhei ki mang thei a nit.

³⁵O PUMAPA, ne hoi inla, nen zôk roh; Nangma donsuina khan a ne siam inlian a, A nit, nangma ritha ngêi khan izôkriamkan a nen om tâk a.

³⁶Irâl kuta tlôm rangin ne phal mak che a, Khasikin, ki îlîr tlak ino a nit.

³⁷Ne doituhei chu ker zûl a, ki man a; Anni kha ken rimang phar mâkah ringam mang e.

³⁸Anni kha thoi thei khâi loi rangin ki sât chit a; Ki makungah an itlôm tâk a nit.

³⁹Nangman ridoina rangin râtna ni ne pêk a; Ne doituhei chu ki nuaiah an ilîr zoi tâk a.

⁴⁰Nangman ke râlhei ki zianga rithokin lâizâm nen tho a; Ne neltuhei murdi khom ken rimang zoi tâk a.

⁴¹Anni chu ṭangpui ringaiin an ikhêk a; Nikhomsela, tute â saninzôk rang omak a, PUMAPA ngêi chu an isam a, nikhomsela, sâm mak a.

⁴²Ki suk inrinôi a, ipildi phâivuan ai sêm inlêng angkah hi an nit. Anni chu lampuia dialdôk angkan ki sir irial tâk a.

⁴³Rihel miheia rithokin ni ne sanisua tâk a; Nam tin chungah rêngin ni ne siam a; Atûn chu ki riat ngai loi mihei khom ki sinthotu an hong nit tâk.

⁴⁴Ram dang mihei khom ki makungah an ikhûn a; Ki thurchi an riatin chu ki thu an zôm ngai a.

⁴⁵Anni chu an indôp tâk a, An kulpuia rithokin inthing pumin an zuang suak a.

⁴⁶PUMAPA chu Pathian iring a nit. Ki lungpui ribîkna chu inpâkin om sela; Ne saninringtu Pathian roinpuina chu inthangin om riseh.

⁴⁷Ani khan ke râlhei chungah nêna a ne pêk a; Nam tin ki thunuaiah a thun lût a,

⁴⁸Ne doituheia rithokin a ne sanisua tâk. O PUMAPA, ke râlhei chungah nêna ne pen la, Thisen isua miheia rithokin nen zôk roh.

⁴⁹Khanchu, nam tin lâiah ner ming inpâk ki ta; Nangma inpâkin zâi ki ti.

⁵⁰Pathian khan nêna roinpui tak a rêng phun ziangah a pêk ngai a; A siriak inrithu Davida neh archihei chung ngêiah khan, Kumkhuakan a lungkhamna lianzia ân lang ngai.