Read Biete LAPUI 19 Bible Online

LAPUI 19 - Biete bible

LAPUI 19

¹Davida Inpâkna Lâ Rivân khin Pathian roinpui zia ân lang a, Boiruak rizat tak khin a kutsuakhei ân lang ngai.

²Sûn hin sûn dang ziangah thu a sîr nôk thiai a; Zân hin zân dang ziangah riatna ân lang nôk thiai mai ngai.

³Thusîr rêng rêng neh ṭong rêng rêng mang mak a; An ṭong irî rêng rêng ireh rang omak e.

⁴Nikhomseh, an rôl irî chu rammual pumpuiah arkhông a, An thusîr chu kôlkil idênin ân thang ngai. Pathianin rivânah khin inî rangin omna a siam a;

⁵Kha nîsa khah moineitu râiifân takka a chontana rithoka, A hong isuak ngai angkan zîngah a hong suak a, Ridâi mi â tlânna lama ritha fân takka tlân ngai angkan ifân takkan a om ngai.

⁶A suakna chu kôlkil monga rithok a nit a, Â tlân kualna chu kôlkomong kiangtiang idênin a nit. A lum reh loia rithup thei rêng rêng omak e.

⁷PUMAPA dân chu a ṭhat rikip a, Ringna a siaminṭhat ngai. PUMAPA thupêk chu iiam a om a, Mi inmôlhei ân vâr ngai.

⁸PUMAPA sôina dânhei chu â dik a, lungril ân lôm ngai. PUMAPA thupêkhei chu arthiang a, mithei ân vâr ngai.

⁹PUMAPA ṭi chu a that a, Kumtluangin a om mai ngai. PUMAPA roirêlna chu â dik a, â fel riai a nit.

¹⁰Khahei khah rângkachak nêk khoma ditiom ual a nit a; Khuaitui nêk khoma â thlum ual a nit.

¹¹Khabanah khan khahei khan ni suak hih riatna an pêk a; Khahei izômin lômna rikhêl tak a ne pêk ngai.

¹²Tutên mahni sin siathei mu thei ngai mak a; PUMAPA, sual rithupheia rithokin ne khâi inrikiang roh.

¹³Thil thonsual tên tên loi rangin ni suak hih ne tu ngit inla; Ki chungah thu innei no roh. Khanchu, ṭhat rikipin om ki ta, Thonsualna natinsat taka rithokin zalen ki ti.

¹⁴O PUMAPA, ki lungpui neh ner tlantu, ki bâia thu suakhei neh, Ki lungrila ngaituanahei hih ni mitmuah iham inrupin om riseh.