Read Biete LAPUI 20 Bible Online

LAPUI 20 - Biete bible

LAPUI 20

¹Davida Inpâkna Lâ Lungzîng nikhuan PUMAPA khan nang sâm riseh. Jakoba Pathian riming khan nang ihoi riseh.

²A mun rithianga rithokin ṭangpuina nang tir pêk sela; Zion tlânga rithokin sanna nang peh riseh.

³Ni thillan murdi iham sela; Ni hâlrivâm thillanhei murdi khom lôm riseh.

⁴Ni lungdo chu nang peh sela; Ni lunginṭong murdi chu lo nang itluk pêk riseh.

⁵Khanchu, ne nênaah khan râifânin zâi ei ta; Ei Pathian inpâkin ni zoina kha lôm ei ti. PUMAPA khan ni ngênna murdi lo nang itluk pêk riseh.

⁶PUMAPA khan a siriak nâl hih nêna a pêk iti atûnah hin ki riat a; A vân rithianga rithokin amah chu a zuk sâm a, A sinthotheinan nêna roinpui tak ai pêk a nit.

⁷Ṭhenkan an sakor tâliheiah an ringat a, Ṭhenkan an sakorheiah an ringat a; Keini chu PUMAPA kin Pathian sinthotheinaah hin kin irngat a nit.

⁸Anni chu ibâng an ta, ilîr an ti; Keini chu thoi kin ta, det ngit kin ti.

⁹O PUMAPA, rêng hih nêna pen la; Nang kin koi lâiin ne sâm roh.