Read Biete LAPUI 22 Bible Online

LAPUI 22 - Biete bible

LAPUI 22

¹Davida Inpâkna Lâ Ki Pathian, ki Pathian, ithôm ni ne mâk a? Îtho sik im ne ṭangpui rangin nî lat vit? Ke khêk irungna thuheia rithokin nî lat hi?

²O ki Pathian, sûnah nang ke sam a, Nikhomseh, ne sâm mak che a; Zânah nang ke sam khomin ringamna mu ual mang a.

³Nikhomsela, nang chu Israelhein nang an înpâk ngai, Mi Rithiangah, rêngṭhungmuna ṭhung chu ni nit.

⁴Kin richibulhei khan nang an lei iam a; A nit, nang an iam a, nangman ni lei sanisua ngai.

⁵Nang an iam a; khanchu, ṭiom ata sanisuan an om ngai a; Nang an iam a; khanchu, mualinphoiin om ngai mak.

⁶Keimah rêk chu miriam khom ni khâi mang; richal kêng kî nit tâk, Mi murdi musit neh sîrinsia ki nit tâk.

⁷Ne mu kan an ne nuiso a; An ner an phen a, an lu an hei a.

⁸Anni khan, “PUMAPA chungah ringat ro ba, Ithôm ani khan nang ân zôk no? PUMAPA khan nang a lômin teh, Ithôm ani khan nang a san no?” an ti a.

⁹Nang chu sûl ata ne lasuaktu ni nit a; Naitesente ki nit lâia rithokin nangman ni ne donsui a.

¹⁰Ki suak nî-a rithoka nangma chunga ringat ki nit a; Nang chu ki nu sungah ki om lâia rithok khomin ki Pathian ni nit.

¹¹Keima rithokin ilah takah om no roh. Lungzîngna a nâi mai a, Ne ṭangpui rang rêng rêng omak e.

¹²Ke râlhei khan serâtchal itam takka angkan an ne hualvêl a; Basan rama serâtchal ihâihei angkan an ne irhual tûng a nit.

¹³Sakeibaknei rikam itloka râm angkan ki tiang an bâi an âng huang a.

¹⁴Ki râtna om khâi mak a, Tui ibua angkan ki râtna om khâi mak. Ki ruhei murdi khom arphêt zoi tâk a; Ki lungril khom khuailu zôi angkah a nit a, Ki sungah hin a zôi zoi tâk.

¹⁵Ki rôl hih bêpil lek angkan a châr zoi a, Ke lei khom ke dangah a kop khap tâk a; Nangman ipilah hin ithi rangin ni ne imâk tâk a nit hih.

¹⁶Mi pualoihei chu ker khîlkan an om a; Ui lômhei angkan an ner hual khap a, Ki kut neh ki kehei an iphop neng tâk a,

¹⁷Ki ruhei murdi chu â lang riai tâk a, Ke râlhei lakin chu an ne en a, an ne phengsan mai a.

¹⁸Ki puanhei an risem a, Ki zakua rangin thla an sân a.

¹⁹O PUMAPA, nang chu keima rithokin ilah vitah om non la, O nen râttu, ne ṭangpui rangin rimot roh.

²⁰Ki ringna hih khandaia rithokin inzôk inla; Ki ringna hih uihei sinthotheina rithokin saninzôk roh.

²¹Sakeibaknei bâia rithokin ne sanisuan la; A nit, ki ringna denginthei tak hih sele rikia rithokin inzôk roh.

²²Ki suapuihei ziangah ni sinthohei inpuang ki ta; Mipui inkhômnaah khan nang inpâk ki ti.

²³O PUMAPA suakhei o, amah chu inpâk unla; Jakoba richi murdihei, amah chu chôiinrisâng rei. Israel mihei o, amah chu chubai ûn rei.

²⁴Ani khan dengthei ituanghei dengthei zia chu, Musit ngai mak a, nel ngai mak e; A mâi chu an zianga rithokin thup ngai mak a, Amah an isamin chu arngai pêk ngai.

²⁵Mipui inkhômna roinpui takah ni sinthohei sikin nang inpâk ki ta. Nangma ṭituhei makungah khan ki ṭonginkung ribôlna chu len ki ti.

²⁶Inrianghei khan fâng an ta, khop an ta, Ama zongtuhei khan PUMAPA inpâk an ti. An lungril chu kumkhuan inharin om mai riseh.

²⁷Nam tin tinin PUMAPA chu riang an ta, PUMAPA tiang kîr nôk an ti.

²⁸PUMAPA chu rêng a nit a, Nam tin chungah roirêltu a nit.

²⁹Rinênga mi lârripâkhei murdi a ziangah la khûn an ta; Â fam thei miriamhei murdi a makungah ikhûnin chubai ûn an ti.

³⁰Rualitharhein a sin thông an ta; Rualithar la hong iom maihei ziangah khan, PUMAPA thurchi chu ril thiai mai an ti.

³¹“PUMAPA khan a mihei a saninzôk,” itin, A la suak ranghei khom la sîr pêk an ti.