Read Biete LAPUI 24 Bible Online

LAPUI 24 - Biete bible

LAPUI 24

¹Davida Inpâkna Lâ Rinêng neh a sunga om murdihei hih PUMAPA ta a nit; Rammual neh a sunga lênghei neh hin.

²Tuikhanglian chungah aman a înding a nit a, Tuipuihei chungah ai phûm indet a nit.

³PUMAPA tlângah[11] tûm a hang ilui a? A mun rithiangah tûm â ding rang?

⁴Kut ifâi neh lungril rithiang inei a, A lungril mirmil chubai ûnna tianga peh ngai ino neh, Mi lêm ituma vâni risâm ngai no mi kha.

⁵Ani khan PUMAPA ziang ata ṭhatvurna dong a ta; A saninringtu Pathian ziang ata felna dong sâng a ti.

⁶Khangkana mihei kha Pathian izongtuhei chu an nit a, Jakoba Pathian mêl izongtuhei chu.

⁷O kul dâikothei, nin lu chunghei kha lâng inrisâng unla, Nangni inkhâr rilunhei, ri-ong pam rei, Khanchu, roinpuina Rêng hih a hong ilût rang a nit.

⁸Roinpuina Rêng chu tu mani? PUMAPA râttak neh sinithothei tak, PUMAPA, ridoinaa sinithothei tak chu a nit.

⁹O kul dâikothei, nin lu chunghei kha lâng inrisâng unla, Nangni inkhâr rilunhei, ri-ong pam rei. Khanchu, roinpuina Rêng hih a hong ilût rang a nit.

¹⁰Kha roinpuina Rêng kha tu mani? Sipaihei PUMAPA khah, Amah ngêi hi roinpuina Rêng chu a nit.