Read Biete LAPUI 25 Bible Online

LAPUI 25 - Biete bible

LAPUI 25

¹Davida Inpâkna Lâ O PUMAPA, ki lungril hi ni ziangah ki sia ngit a,

²O ki Pathian, nangmah nang ki iam a, Mualinphoiin nen om tlak non la; Ne doituhein an ne ngaminsiat rang phal no roh.

³A nit, nangmaa ringattuhei rêng rêng chu tute mualinphoiin om no ni a, Nikhomsela, nangma chunga rihel zel zeltuhei rêk chu mualinphoiin om an ti.

⁴O PUMAPA, ni lampuihei kha nen rian la; Ni felna lampui thurchihei kha nen risei roh.

⁵Ni thutakah khan ne ṭhui inla, nen risei roh, Nang chu ne saninringtu Pathian ni nit a; Tiklâi khomin ni chungah ki irngat mai a nit.

⁶O PUMAPA, ni lungkhamlianna dâi ngai ino, Tiana lei iom kumkhua tâk kha remai roh.

⁷Ki vânglâi sualnahei neh ki thonsualnahei kha remai non la; O PUMAPA, ni ṭhatna neh lungkhamlianna sikin ne remai roh.

⁸PUMAPA chu a ṭhatin, a fel a, Khasikin, mi sualhei kha an fena rang lampui ân mu ngai.

⁹Ringaiintlômhei chu roirêlna felah â ruai a, Anni chu a lungdo thuhei ân risei ngai.

¹⁰A thuthlung ivong neh a thupêk izômtuhei chu, PUMAPA khan lungthlungna neh diknan a kâiruai ngai a.

¹¹O PUMAPA, nangma riming sikin, Ki sualhei ngaidam roh; Natinsat tak a nit.

¹²PUMAPA thu zômtuhei chu, A ziang ata an lampui rô rang riang an ti.

¹³Anni chu vângisakin om an ta, An naihei khan ram chu luang an ti.

¹⁴PUMAPA chu ama ṭituhei ta rangin rual a nit a, A thuthlung chu anmaniah ân det ngai.

¹⁵Ki mitin PUMAPA tiang a en mai a, Ani khan mun inrît ata a ne sanisua ngai a.

¹⁶PUMAPA, ki tiang mâi ngat inla, lung nen kham roh, Beidong neh rizal takkan kî om a nit.

¹⁷Ki lungril buaina hih nen zâng pêk inla, Ki lungzîngna murdihei ata hi nen zôk roh.

¹⁸Ki dengtheizia neh ki lungzîngzia hi ngaituan la, Ki sual murdi ngaidam roh.

¹⁹En ta, ne doituhei tamzia so; Natinsat takkan an ne inel a nit.

²⁰O, ki ringna vong inṭhan la, ne saninzôk roh; Mualinphoiin nen om non la, Nangma tiang ki irbat a nit.

²¹Ki lungril ṭhatna neh diknan ne sunghual sela, Nangmaah ki iamna ker ngat mai sikin.

²²O Pathian, ni mi Israelhei hih, An lungzîngna murdi ata saninzôk roh.