Read Biete LAPUI 27 Bible Online

LAPUI 27 - Biete bible

LAPUI 27

¹Davida Inpâkna Lâ PUMAPA chu ke vâr neh ki saninringtu a nit; Tûm ki ṭi rang a? PUMAPA chu ki ringna kulpui a nit a; Tute ṭi no ning e.

²Thil ṭhano thotuhei khan ne that ituma an ne doi lâiah khan, An risuia, an ilîr zoi tâk a.

³Sipai lômhein ne doi itumin ne hual khom seh, Ki lungril indôp no ni a; Ke râlhein ne doiin ner sualpui khom sela, Pathianah ringat mai ki ti.

⁴PUMAPA ziangah thil khatkah ki ngên a; kha bang khah chûn ki ti: Ki ring kongkârkah PUMAPA ina om mai thei a, PUMAPA ṭhatzia mu rang neh a kâiruaina dong rang hi.

⁵Lungzîng nî-ah khan a riabukah nen ribîng a ta; A saninzôkna puan inah khan ne thup a ta; Lungpui chungah khan ne dom ikhâi a ti.

⁶Atûn chu ne doitu, ne hualvêltuhei chungtiang, Ki lu hih chôiinrisângin om a ta, Khanchu, ilôm pumin a biak Inah ribôlna lan ki ta; Lâ sak ki ta, PUMAPA inpâkin zâi ki ti.

⁷O PUMAPA, nang ke sam lâiah hin ner ngai pêk roh, Lung nen kham inla, ne sâm roh.

⁸“Ki ziangah hong rei,” itia ni ne koi lâiah khan, Ki lungrilin ni ziangah, “PUMAPA, ni ziangah hong ki ti” a ti a.

⁹Keima ata hih ni mâi thup non roh. Ni suak hih ningthikin inkîr nôk no roh. Nang chu ne ṭangpuitu ni nit ngai a; O ne saninringtu ki Pathian, nung ne songin ne marak no roh.

¹⁰Ki nu neh ki pan ne mah khom seh, PUMAPA khan ne donsui a ti.

¹¹O PUMAPA, ni lampuihei nen mun la, Ke râlhei sikah hin lampui richam riamah ne ṭhui roh.

¹²Ne doituhei nuamlo rangin an kutah ne marak non la, Milak thu neh iṭhina ṭonga an ne doinaah hin.

¹³Hi damsung ngêiah hin PUMAPA ṭhatna mu ritûng non lang chu, Ki irzal neng rang tâk a nit.

¹⁴PUMAPA chu ngâk mai roh. Irât takkan om inla, ni lungril indet roh; A nit, PUMAPA chungah khan ringat mai roh.