Read Biete LAPUI 28 Bible Online

LAPUI 28 - Biete bible

LAPUI 28

¹Davida Inpâkna Lâ PUMAPA, O ki lungpui, nang kî îsam a nit. Ki ṭapna tiang ne kuar sung roh. Nangman ni ne sâm non chu mithi khua fehei lâiah om duai ki ti.

²Nang ke sam a, ki kuthei hi ni Biak In mun rithiang tiang ki pharin, Ṭangpui ki ngênna rôlhei hi ringai roh.

³Mi siahei neh thil ṭhano tho ngaituhei neh munkan thiamno nen chang non la, Anni khan an bungtualbômhei ziangah ringeina thu an isîr ngai a; Nikhomsela, an lungril chu narsana sip a nit.

⁴An sintho lam angkah takin thung inla, An sinthohei insual lam angkah takin thung roh. A nit, an kuta an sintho lam angkah takin thung inla; An sual man chu inmuh roh.

⁵PUMAPA sintho neh a kuta a thiltho khah an ngaisak no sikin, Ani khan annihei chu siam inding khâi loi rangin isiang a ti.

⁶Ṭangpui ki ngênna rôlhei arngai sikin, PUMAPA chu inpâkin om riseh.

⁷PUMAPA chu ki râtna neh ke pho a nit a; Ki lungril hin amah a iam a. Khanchu, ṭangpuina a ne pêk a, ki lungril hi a lôm tak tak a; Ki lômna lan amah ki inpâk a nit.

⁸PUMAPA chu a mihei ta rangin râtna a nit a; A siriak nâla ta rangin zôkna kulpui a nit.

⁹PUMAPA, ni mihei saninring inla, Nangma tahei chu ṭhatvur roh. Annihei chu enkol inla, kumkhuakan donsui roh.