Read Biete LAPUI 29 Bible Online

LAPUI 29 - Biete bible

LAPUI 29

¹Davida Inpâkna Lâ O vân mi rithianghei, PUMAPA chu inpâk unla; PUMAPA ziangah khan roinpuina neh sinthotheina peh rei.

²PUMAPA riming roinpui tak chu inpâk unla; Rithiang thluka rivon[13] PUMAPA chu chubai ûn rei.

³PUMAPA rôl chu tuipuihei chungah khan â rî a; Roinpuina Pathian chu a zuang irî dur dur a, PUMAPA ngêi chu tui itam takhei chungah a hong irî a.

⁴PUMAPA rôl chu a sinthotheina murdi neh a roinpuina murdin â rî dur dur a.

⁵PUMAPA rôl khan sidar thinghei chu â khiak a; A nit, PUMAPA khan Lebanon tlânga sidar thinghei kha â khiak rem rum a.

⁶Serâtte tual ridâi angkan Lebanon tlânghei chu ân ritôp a, Hermon tlâng[14] chu ramsial tuai angkan ân richôm a.

⁷PUMAPA rôl khan khothlâr ân rilek a,

⁸PUMAPA rôl khan ramchârhei â tlor innîng a; Ani khan Kades ramchâr chu ân nîng a.

⁹PUMAPA rôl khan saso thing chu â soi innîng a, Rampui thing nâhei chu â nuai iṭhul vang a; A Biak Inah khan mi tinrêngin, “Pathian chu a roinpui e” itin an ikhêk a.

¹⁰PUMAPA chu tui inthûk tak chungah khan Rêngin â ṭhung a; A nit, PUMAPA chu kumkhuantluangkan Rêngin a înlal a nit.

¹¹PUMAPA khan a mihei ziangah râtna a pêk ngai a, Anni chu thlangamnan ṭhat a vur ngai.