Read Biete LAPUI 30 Bible Online

LAPUI 30 - Biete bible

LAPUI 30

¹Tempil a lan lâia inpâkna lâ: Davida Inpâkna Lâ O PUMAPA, nang inpâk ki ti; Nangman ni ne saninzôk tâk a, ke râlhei khan an ne riam rang ni phal no sikin.

²O PUMAPA, ki Pathian, Nang ke sam a, nangman ni nen dam tâk a.

³O PUMAPA, nangman ki ringna hih thlânbâi ata ni kâiisua a; Thina khur inthûk[15] takah fe loi rangin nangman ki ringna ni saninring tâk a.

⁴O a mi rithianghei, PUMAPA inpâkin zâi unla; Arming rithiang chu inpâk rei.

⁵A ningmur chu mitkhap kârkah bang a nit a; A ditsakna chu ring kongkârkah a nit. Zân thluanin mitrithli a luang khom a nit thei a, Nikhomseh, zîngah chu râifânna a hong tlung ngai.

⁶Keiman chu ki nunkhohoi lâiah khan, “Tiklâi khomin inîng no ning e,” ki ti a.

⁷O PUMAPA, nangma ditsakna sikin itlâng idet angkan ni nen ding a; Nikhomseh, ni mâi ni thup a, ker lo a înthing tâk a nit.

⁸O PUMAPA, nang ke sam a; Nangma ziang ngêiah lungkhamna ki ngên a.

⁹“Thin lang, thlân khurah ne phûm seh, ni rangin rifena im a om rang? Mi thihei khan nang an înpâk thei rang mani? Ni thutakhei hi an inpuang thei rang mani?

¹⁰O PUMAPA, ringai inla, lung nen kham roh, O PUMAPA, nangman ne ṭangpui roh,” ki ti a.

¹¹Ki mithi beidongna chu râifâna lâmna ni nen chang pêk tâk a; Ker khîlkan lômnan ni ne ihualvêl tâk a nit.

¹²Khasikin, dâirek loiin, PUMAPA chu inpâkin zâi ki ti. O PUMAPA ki Pathian, Kumkhuakan lômthu nang ril mai ki ti.