Read Biete LAPUI 31 Bible Online

LAPUI 31 - Biete bible

LAPUI 31

¹Davida Inpâkna Lâ O PUMAPA, nangma zilah ki hong ribei; Mualinphoiin nen om tlak non la, Ni felna sikin ne saninzôk roh.

²Keima tiangah hin ne kuar sung inla; Atûn nen zôk zel roh, ki rangin ribîkna lungpui idet nin la; Ki zôkna ranga kulpui ni roh.

³A nit, nang chu ker bîkna lungpui neh ki zôkna kulpui ni nit a; Khasikah khan ni ṭonginkung angkan ne ruaiin ne kâi roh.

⁴Ke ôkna ranga a rûka châng an idoa rithokin nen zôk roh; Nang chu ki kulpui ni nit a.

⁵Ni kutah ker thla[16] ken kol a, O PUMAPA, Pathian idik, nangman ni ner tlan tâk.

⁶Mirmil Pathian chubai iûnhei chu ni nel a; Keiman chu PUMAPA kî iam a nit.

⁷Ni lungkhamlianna sikah hin râifânin lôm ki ti. Nangman ki lungzîngna ni riat ngai a; Ki dengtheina tinrêng khom ni mu ngai.

⁸Khante, ne doituhei kuta tâng rang ne phal mak che a; Zalen taka om rangin ki kehei mun rizatah ni ne sia pêk a.

⁹O PUMAPA, lung nen kham roh, Lungzîng takkan kî om a nit; Ki mit hi beidongna sikin a ṭuai tîng tîng a, Ki taksa neh ki ringna khom hih.

¹⁰Ki ringnun hi lungdûkin ki mang tâk a, Ki kumhei khom hih ṭap irungin ai hek tâk a nit. Ki lungdongnahei sikin ker tha a ṭuai a, Ki ruhei khom a rôp zoi tâk a.

¹¹Ne doituhei sikin ker ming hi a hong siat tâk a, A nit, ki bungahei lâiah natinsat takkan ai siat tâk a nit. Ki mêl riathei ta rang khomin ṭiom ki nit tâk a; Tolâia ne muhei kan lâizâm an tho tâk a.

¹²Mithi an irngil angkah takin ringilin ki om a; Bekorok angkah pai ki nit tâk.

¹³Ke râlhei itam taka risôn sat sat ki riat a; Kil tinah ṭiomin a ne hual vêl a. Anni khan ne doiin ṭhano an phan a, Ne that itumin an iphiar a nit.

¹⁴Nikhomsela, O PUMAPA, ki iamna chu nangmaah a nit a, “Nang chu ki Pathian ni nit,” ki ti a.

¹⁵Ki zorohei chu ni kutah a om a; Ne doituhei kut ata neh an nuam ne lôtuhei kut ata hih ne saninzôk roh.

¹⁶Ni mêlin ni bôi hi zuk elinvâr inla; Ni lungkhamliannaah khan ne saninzôk roh.

¹⁷O PUMAPA, nang ki îsam a nit, mualinphoiin nen om non la; Mi siahei chu mualinphoi sela; Mithi khuah ṭong loiin fe riseh.

¹⁸Mûr milakhei chu ṭong thei loiin om riseh; Kha mihei khan ripâk neh musit pumin, Mâi ithlâi takkan mi felhei khah an isîr insiat ngai.

¹⁹O, ni ṭhatna, nangma ṭituhei ranga ni bûm chu a roinpui vang na! Miriam naihei mitmuah nangmaa iamna ringattuhei ranga nî tho pêk chu.

²⁰Anni chu mihein an phiarrûk lâiin ne ṭângsungah ni thup ngai a; An irâlhei êsêlna rithokah khan ne zilah ni thup ngai.

²¹PUMAPA, chu inpâkin om riseh. A lungkhamlian tlia chu rikhêl takkan a nen mu a, Irâlin khopui an ihual vung angkana ihuala ki om lâiah khan.

²²Kei lak chu lungindongin, “Ni mitmu ata pai inrimangin kî om tâk a nit,” ki lei ti a. Nikhomseh, nang ke samin chu ṭangpui ki ngênna rôl khah ni ner ngai pêk a.

²³O, a mi rithiang murdihei, PUMAPA lungthlung rei, PUMAPA khan mi iamomhei chu a saninzôk ngai a, Mi lârripâkhei chu natinsat takkan a thung ngai.

²⁴PUMAPA ngâktu murdihei o, Irât takkan om unla, nin lungril indet rei.