Read Biete LAPUI 32 Bible Online

LAPUI 32 - Biete bible

LAPUI 32

¹Davida Inpâkna Lâ A siatna ngaidama om a, A sualna izâa om chu a ham a ṭhat e.

²Mi, PUMAPA khan puanona neia ai be no a, A ringnuna diknona rêng rêng om ino mi chu a ham a ṭhat e.

³Ki sual ki thup ṭian lâiah khan, sûn isôtka ke rungnaah khan, Ki takpum hi a irzal zoi tâk a nit.

⁴PUMAPA, a sûn a zânin ni ne sôina kutin a ne del a; Kholum nîsân thingnâ a înthêm ngai angkan ki râtna khom a hong rizal tâk.

⁵Khanchu, ki sualna chu ni ziangah ken puang a; Ke châina chu thup khâi mang a, “Ki thonsualna chu PUMAPA ziangah thupha chôi ki ti,” ki ti a; Khanchu, nangman ki sual porinche chu ni ne zâ tâk a.

⁶Khasikin, Pathian ngaisak mi murdîn mu olah ni om lâiin ni ziangah ṭongṭai riseh; Buaina tuilian chu a hong ilêt tikin anni chu chîm phâk no nih.

⁷Nang chu ker bîkna mun ni nit a; Nangman lungzîngna ata ne sanisuang ni ta, Saninringna lâhein ner kul mai ni ti.

⁸PUMAPA khan, “Ni fena rang lampui nang inmûng ki ta, Nang inrisei ki ta; ki mita nang ien maiin roi nang sakpui ki ti.

⁹Ngaituana nei ino sakor manih, Sakuartung manih angkan om no roh; Khahei khan isôina lâkam thîr an ipet ngai, Khanonchu, ni thu ôi thei no nih,” a ti a.

¹⁰Mi sia rangah khan dengtheina itam takkah a om a; PUMAPA iamtu rêk chu lungkhamlianan hualvêl a ti.

¹¹Mi felhei o, PUMAPAA khan râifânin lôm unla; Lungril idiktak ripu murdihei o, râifânin ipâi rei.