Read Biete LAPUI 33 Bible Online

LAPUI 33 - Biete bible

LAPUI 33

¹Mi felhei o, PUMAPAA khan lôm rei; Mi dikhein chu Pathian an inpâk rua pial a nit.

²Serandan PUMAPA ziangah khan lômthu sîr unla; Perkhuang neh amah inpâkin zâi rei.

³Amah chôiinrisângin lâ thar sak unla, Ithiam takka irîhoi itumin, râifânin ipâi rei.

⁴PUMAPA thuhei chu â dik a; A sintho murdi chu ringat inrup a nit.

⁵Felna neh dikna hi arngai inlut a; Rinêng chung hi PUMAPA lungkhamliannan a sip a.

⁶PUMAPA thun rivânhei chu isiam a nit a, Inî, ithla, ârsihei khom khi a ṭongbâi suaka siam a nit.

⁷Ani khan tuikhanglian tuihei chu mun khatkatah a bûm khôm a; Tui inthûk takhei chu siamun inheiah a sian ṭhat ngai.

⁸Rammual pumpuiin PUMAPA chu ṭi sela, Rinêng chunga om murdihein ani chu marit tho riseh.

⁹Ani chu a ṭong a, rammual a hong om a; A thupêkin thil tinrêng a hong iom a nit.

¹⁰PUMAPA khan namhei thiltum chu chanlamboi ân chang pêk a; An thil ngaituahei chu îte rifena boiin a siam pêk ngai.

¹¹PUMAPA roisak chu kumtluangin om det mai a ta; A thiltumhei chu suanpâr idênin om det mai a ti.

¹²PUMAPA Pathiana nei nam chu an ham a ṭhat; Ama ta rang bîka a irthlang mihei chu.

¹³PUMAPA khan rivân ata a zuk thlîr a; Miriam naihei murdi hi a mu riai ngai a.

¹⁴Rinênga om murdihei hi, A omna muna rithokin a zuk thlîr ngai.

¹⁵An rêngka lungril isiamtu khan, An sinthohei murdi a riat vang ngai.

¹⁶Rêng hi a sipai tam sik ringotin saninzôkin om ngai mak a; Mi rât khom a rât sik ringotin inzôk ni ual ngai mak.

¹⁷Sakor hi irâl zoina rangin chu mangmunboi a nit; A rât bâk bâk sikin tute inzôk thei ual no nih.

¹⁸Ringai ta, PUMAPA mit chu, Ama ṭituhei chungah khan a fûk mai ngai a; A lungkhamlianna tûnghei chungah khan.

¹⁹Ani khan thina ata a saninring ngai a; Ṭâm tlâk zoro khomin an ring mai ngai.

²⁰Kin ringna hin PUMAPA chu a ngâk mai a; Ani chu ne ṭangpuitu neh kin ipho a nit.

²¹Amah-ah khan kin lungril hih a lôm a; Arming rithiang kin iamna bi a nit.

²²O PUMAPA, ni lungkhamlianna chu kin chungah om riseh; Nangmah hi kin tûngpui chu ni nit.