Read Biete LAPUI 34 Bible Online

LAPUI 34 - Biete bible

LAPUI 34

¹ Davida iphua: Abimeleka makungah invêt angkan a om pêk a, ani khan a lei ûmisua lâia mi. Tiklâi khomin PUMAPA chu inpâk mai ki ta; Ama inpâkna chu ki bâiah suak mai a ti.

²Ki ringna hin PUMAPA chu a song tak tak a; Nuamlo tuanghei murdi khan reh sela, lôm riseh.

³O, PUMAPA chu nen pâkpui unla; Arming chu lei chôiinrisâng rei u.

⁴PUMAPA chu ke sam a, Khanchu, ani khan a ne sâm a; Ki ṭina murdi ata a ne sanisua tâk.

⁵Nuamlo tuanghei khan amah chu an en a, an lôm tâk a; Anni chu tiklâi khomin mualinphoiin om tlak no nih.

⁶Mi riangvâihein an isam a, Khanchu, ani khan a sâm ngai a; An lungzîngna murdi ata a sanisua ngai.

⁷Ama ṭituhei chu an rikhîl kan, PUMAPA vântirtônin a ompui ngai a, Ṭiom ata a sanisua ngai.

⁸O PUMAPA ṭhatzia hih ritem ngân ta u! Amaa iamna ringat mi chu a ham a ṭhat.

⁹O, a mi rithiang murdihei o, PUMAPA chu ṭi unla; Ama ṭituhei rêng rêng chu risamna nei ngai mak.

¹⁰Sakeibaknei ilua risamin an danginda ngai a, PUMAPA zongtuhei rêng rêng chu risamna nei ngai mak e.

¹¹Hong rei, naipanghei o, ki thu ringai rei, PUMAPA ṭi dân nangni inrisei ki ti.

¹²Râifân takka ringna mang ni nuam im? Zoro ṭhahei imua dam isôt ner zuk im?

¹³Ner zukin chu ne lei kha sual ata vêng inṭhan la; Ni bâi khom lêmna thu ril loi rangin vêng inṭha roh.

¹⁴Sual nungsong inla, iṭha sin inla; Ni lungril murdin ringeina zongin zâltak song roh.

¹⁵PUMAPA khan mi felhei chu a ensui ngai a; Â kuar khom an ṭongṭaina tiang a sung ngai a.

¹⁶PUMAPA khan sual isinhei chu a doi ngai a, Anmani riatmaina chu rinêng ata inrimang rangin.

¹⁷Mi felhein an isamin chu PUMAPA khan arngai ngai a; An lungzîngna murdi ata a sanisua ngai.

¹⁸PUMAPA khan lungrila ringaiinsiahei chu a nâi ngai a; Lungrila insîrhei chu a saninring ngai.

¹⁹Mi fel chu dengtheina itam takkah a tong ngai a, Nikhomseh, PUMAPA khan khahei murdi ata khah a saninzôk ngai.

²⁰PUMAPA khan ani chu a vongin ṭhat a; A ru khatkah khom ikhiak ngai mak e.

²¹Thil ṭhanon mi sia chu inrimang a ta; Mi fel ineltuhei chu thiamno chang an ti.

²²PUMAPA khan a mihei chu saninring a ta; Amah-a iamna ringathei chu tute thiamno changin om no nih.