Read Biete LAPUI 35 Bible Online

LAPUI 35 - Biete bible

LAPUI 35

¹Davida Inpâkna Lâ O PUMAPA, ne doituhei chu nangman doi inla, Ner sualpuihei chu nangman risualpui roh.

²Ne pho neh ni râlthluk lan la, Ne ṭangpui rangin rithok roh.

³Ne fei neh ni khandai chu ke râlhei chungah ilek inla; Ki ringna ziangah hin, “Nang saninringtu ki nit,” ti roh.

⁴Ki ringna inrimang ituma zongtuhei chu, Mualinphoiin neh mâimôkin om sela, Ki siatna rang ingaituatuhei chu lâizâm ithon lungdongin om riseh.

⁵PUMAPA vântirtônin ûmrizûl sela, Farsi ithli isêm inlêng angkan om riseh.

⁶PUMAPA vântirtônin arzûl mai lâiah khan, An lam chu izîng richel tak neh rinâl tak ni riseh.

⁷A bi om loiin ke ôkna rang châng an do a; A bi om loiin ki tlâkna rang dîp an choih a.

⁸Nikhomsela, an intûng no lâiin siatna an chungah tlung a ta; An châng do nâk nâkah anmani iôk an ta, An rimangna rangah ṭul an ti.

⁹Khanchu, PUMAPA a khan lôm ki ta; A ne saninringnaah khan lôm ki ti.

¹⁰Ki lungril murdin PUMAPA ziangah, “PUMAPA, nangman mi râthei kut ata mi riangvâihei kha nen zôk a, A nit, inrianghei neh farahei kha â nuaisiatuhei kut ata nen zôk a; Nangma angkana tute zel omak,” tîng ki ti.

¹¹Riatpuitu dik ino takhei ki chungah an hong rithoi a, Ki thil riat viat loi thuheiah an ne nô a.

¹²Thil iṭha chu ṭhanon an ne thung a, Ki ringna hi peiintemin ai om tâk a nit.

¹³Keimah chu an damno lâiah khan, Borapuan ki sil a, bu ki ngei a; Ikhûnin ki ṭongṭai ngai a.

¹⁴Ki rual rang manih, ki suapui rang mania ngaiinsia dôran, Lusûn angkan ikhûnin ker long ker long a; Mi, a nu sûn angkah dôran ki om a.

¹⁵Nikhomsela, ki lungzîngnaah khan anni chu an lôm a, Ne phengsan rangin an ribûm a; Ki riat ngai loi mihei khan kuttum an ne tho a, Mong loiin an nuam an ne lo a.

¹⁶Musit takkan an ne phengsan tîr tîr a, Mumâk takkan an rikam an ne rôt a. [17]

¹⁷PUMAPA, itena sôt im nî en ṭian rang? An inrimangna kut ata chu ne sanisuan la; Hi sakeibakneiheia rithokin ki ringna hi saninzôk roh.

¹⁸Khanchu, ni mihei inkhômna roinpui takah khan ni ziangah lômthu ril ki ta; Mi murdi mitmuah nang inpâk ki ti.

¹⁹Ke râl mi dikinohei chu ki chungah inri-iam non la, A san iboia ne neltuhei chu ki ngaisiatnaah hin musit mêl ifânin in-om no roh.

²⁰Ringeina thu rêng rêng ril ngai mak a; Kha nêkan chu ringeina lungithlung mihei demna rangin, Milak chi tinrêng an phua ngai.

²¹An bâiin an ne khêk iroi a; “Kha! kha! Ei mitin a sintho ei mu tâk,” an ti ngai.

²²O PUMAPA, nangman ni mu tâk a, dâirek no roh; O PUMAPA, ne lah vit tlak no roh.

²³Ki PUMAPA neh ki Pathian, Ki roi ne rêl pêk rangin neh ki chungthu ne thlop rangin, Har inla, thoi roh.

²⁴O PUMAPA ki Pathian, ni felna angkah takin mi felin ne ben la; Ke râlhei khan ne riam no riseh.

²⁵An lungrilin, “Kha! Ei lungdo tak ei mu tâk a, Ani chu ei ilem zoi tâk,” ti no riseh.

²⁶Ki dengtheina chunga riiamhei chu mualphoi tak neh lungidong takkan om sela; Ki chunga om ilian ithohei chu mualphoina neh mâimôkna insilin om riseh.

²⁷Mi fela bea ki om chunga lômhei chu râifânin ipâi sela, lôm riseh; “A suak thluantlungna chunga lôm ngai PUMAPA chu chôiinrisângin om riseh,” itin nôk nôk riseh.

²⁸Khanchu, ni felna chu inpuang ki ta, Sûn thluanin nangma inpâkna lâ sak ki ti.