Read Biete LAPUI 36 Bible Online

LAPUI 36 - Biete bible

LAPUI 36

¹PUMAPA suak Davida lâ Sualin mi sia lungrilah thu â sîr a; A mêlah Pathian ṭina zel omak e.

²“Ki sualna mu suak thei no ni a, Thiamno nen chang thei no nih,” itin mahnin arpâk ngai.

³A ṭongbâi suakhei chu siatna neh lêmna thun a sip a; Ivâr omdân neh thil iṭha sin a bâng ngai.

⁴A zâlmunah khan thil isual a ngaitua ngai a; Lam dik inoah a fe ngân ngân a, Sualna chu nel tlak ngai mak.

⁵O PUMAPA, ni lungkhamlianna chu rivân a sun a; Ni iamomna chu vânlâizôlhei khom khi ai dên a nit.

⁶Ni felna chu tlâng risâng takhei angkah a nit a; Ni roirêl dikna chu tuipui inthûk tak angkah a nit. O PUMAPA, miriam neh ramsahei chu ni donsui ngai a.

⁷O PUMAPA, ni lungkhamlianna chu a lut vang na! Miriam naihei khan ner thla nuaiah zôkna an mu ngai a.

⁸Anni chu nangman ifarua nî pêkah khan ikhop neh ithlâi takkan an om a; Nangma ṭhatna vadunga rithokin nen in sa ngai a.

⁹Ringna murdi nâr chu nangmah ni nit a, Nangma vârah khan ivâr kin imu a nit.

¹⁰O nangma retuhei chungah khan ni lungkhamlianna inlang mai inla; Mi felhei chungah khom ni ṭhatna inlang mai roh.

¹¹Lârripâkhei ke chu ne doi rangin ki tiang kalchôi no sela; Mi siahei kut khomin lâizâm nen tho no riseh.

¹²En ta, soah son thil ṭhano thotuhei chu an ilîr a, Nam inlîrin an om a, thoi nôk thei khâi no nih.