Read Biete LAPUI 37 Bible Online

LAPUI 37 - Biete bible

LAPUI 37

¹Mi sual neh mi ṭha tenkung PUMAPA suak Davida Inpâkna lâ Mi siahei sikin beidong risak non la; Thil dikino sinhei kha rizuk no roh.

²Anni chu loisûl ai rôp ngai angkan rôp zel an ta; Sûliring ai thêm ngai angkan thêm an ti.

³PUMAPA iam inla, thil iṭha sin roh. Hi ramah hin om inla, vângisakin om roh.

⁴PUMAPA chungah khan lôm inla, Ni lungdohei chu nang pêng a ti.

⁵Ni omdân rang chu PUMAPA chungah ringat inla; Amah iam inla, aman nang ṭangpui a ti.

⁶Ni felna neh ni thiam changna chu sûnlâi inî vâr angkan invâr a ti.

⁷PUMAPA makungah khan dâirek inla, amah ngâk ngêi ngêi roh; Mi a lampuia vânṭhatna donghei sikin beidong risak non la, An ngaitua sualhei lôntluktu sikah khan.

⁸Ningmur bâng inla, ningthik ima roh; Lungdûk risak no roh, buaina bang kêng â thlun ngai.

⁹PUMAPA-a ringattuhei khan ram hih luang an ta, Mi pualoihei rêk chu rimang vang an ti.

¹⁰Itôiteka nungah chu mi pualoihei hi rimang vang an ta; An omna munah khan en khom inla; mu khâi no tin.

¹¹Ringai ichînhei rêk khan chu ram hih luang an ta, Ringeina neh vângsakna chu dong an ti.

¹²Mi sia khan mi fel idoiin ṭhano a phan a, Arkam â rôt pêk ngai.

¹³PUMAPA khan mi siahei chu â nui ngai a, Inrimangin om zel an ti, iti a riat sikin.

¹⁴Inrianghei neh farahei inlîr rang neh mi dikhei ithat rangin, Mi siahei khan an khandai an thuat a, an phel an sân ngai.

¹⁵Nikhomseh, an khandai nâk nâkah khan ripal an ta, An phelhei chu ikhiakin om a ti.

¹⁶Mi felin thil iroicheka ai nei chu, Mi siahein thil an inei zuak nêkan a lut ual.

¹⁷Mi siahei ibân chu ikhiakin om a ta, Mi felhei rêk chu PUMAPA khan â tûk indet mai ngai.

¹⁸PUMAPA khan mi ṭhatrikiphei chu a donsui ngai a, Kumkhuakan hi ram hih an ta nîng a ti.

¹⁹Zoro ṭhanoah mualinphoi no ni a; Ṭâm kumhei khomin khop an ti.

²⁰Mi siahei rêk chu rimang an ta; PUMAPA doituhei kangân chu phûlpâr angkan vun an ta, Meikhû angkan rizâm rimang an ti.

²¹Mi sia khan artâng a, peh nôk khâi ngai mak, Mi fel rêkin chu lungkhamna a nei a, ipen a pêk ual ngai.

²²PUMAPA ṭhatvurna dongtuhei khan ram hih luang an ta, Vâni sâma omhei chu ûmisuan om an ti.

²³PUMAPA khan an fena rang lampuiah a ṭhui ngai a, A nuamlam isintu chu a donsui ngai.

²⁴Ilîr man sela, ilîr thal no ni a; PUMAPA khan a kutin â tûk mai sikin.

²⁵Itar ki nit tâk a, kum itam takkah ki hong lêng tâk a, Nikhomseh, PUMAPA khan mi fel ai mâk la mu ngai mang; Archihei kutdoa om khom la mu ngai mang e.

²⁶Tiklâi khomin mi lung an inkham a, Â tlongin neh ithungin mi an sem ngai a, An richihei khomin vânneina an dong ngai.

²⁷Sual nungsong inla, iṭha sin roh; Khanchu, kumkhuakan hi ramah hin om mai ni ti.

²⁸PUMAPA khan roirêl idik arngai inlut ngai a; Ama ṭituhei [18] chu ensan ngai mak a, Kumkhuakan a enkol inzôk ngai a. Mi sia richihei chu inrimangin om an ti.

²⁹Mi felhei khan ram hih luang an ta, A sungah kumkhuakan lêng an ti.

³⁰Mi fel bâi khan vârna thu â sîr ngai a; Tiklâi khomin â leiin thudik a ril ngai.

³¹A Pathian dân chu a lungsungah a rê ngai a, Tiklâi khomin a zôm mai ngai.

³²Mi sia khan mi fel chu ardîp ṭian a; That inrimang a tum ngai a.

³³Nikhomsela, PUMAPA khan ani chu â râlhei kutah marak no ni a, A roi an rêl tikah khom thiamno inchang rang phal no nih.

³⁴PUMAPA a khan ni iamna ringat inla, a thupêkhei zôm roh. Khanchu, ram nang inluan nang chôiinrisâng a ta, Mi siahei inrimanga an om lâi la mûng ni ti.

³⁵Voikah chu mi sia richam inei tak ki mu a; Ani kha Lebanon tlânga sidar thing itôt lûr angkan mihei chungah â tôt lûr a.

³⁶Nikhomsela, nungah lampuiah ki thleng rilôi nôkin chu, Ringai ta, ani khah lei om khâi mak a; A nit, ki zonga; khannisela, mu khâi mang e.

³⁷Mi sêlnaboi chu richik inla, Mi fel chu eninchial roh; Khaangkana mihei mongna chu thlangamna a nit.

³⁸Mi sualhei chu an rêngkan inrimang nîng an ta, An richihei khom inrimang [19] nîng an ti.

³⁹Mi felhei saninringna chu PUMAPA ta a nit a; An lungzîng lâia an kulpui risâng a nit.

⁴⁰PUMAPA khan anni chu iṭangpuiin a saninzôk ngai a; Ama ziangah an iamna an ringat sikin, Mi siahei ata sanisuan ân zôk ngai.