Read Biete LAPUI 38 Bible Online

LAPUI 38 - Biete bible

LAPUI 38

¹Davida Inpâkna Lâ O PUMAPA, ningmurin ne ngo non la, Ningthikin ne sôi no roh.

²Ni thalhei chu ki pangah arzep ngit a; Ni kuttum chu ki chungah a ṭum tâk a.

³Ni lunghoinona sikin denginthei takkan ki om tâk a; Ki sual sikin ki takpum hi natna ai sip tâk a nit.

⁴Ki sualnaheiah hin ker nîk tâk a; Puakirik tak ki pêl zoi loi rang angkah a nit tâk.

⁵Ken tlôkna sikin ki sâbêhei hih ai ulinpupin ai thûk zoi a nit tâk.

⁶Ki nat a, ke khûn ṭian a; Sûn isôtkah beidongin ki ṭap a.

⁷Ki takpum hi a lum vung vung a, Ki taksa khom hi dam ual tik zel om khâi mak e.

⁸Ker zal neng a, a ne zeng zal tâk a; Ki lungril sôlna sikin ke rung rak rak a.

⁹O PUMAPA, ki irzuk tak chu ni riat a; Ke rungna murdi hi nî riat riai a nit.

¹⁰Ke lung hi artôm dûp a, Ritha song rang nei khâi mang a, Ki mit vârna lakin chu a ne mâk tâk a.

¹¹Ki malhei neh ki bungtualbômhei laka chu, Ki natna sikin an rikiang zoi tâk a; Ken zirpuihei tak ilua khomin ne nâi ngam khâi mak a.

¹²Ki ringna inrimang ituma zongtuhei khan ke ôkna rang châng an kam a, Ki siatna rang izongtuhei khom khan thu ṭhano takhei an ril a; Sûn isôtkah ne thatna rang an phan mai ngai.

¹³Nikhomsela, kei chu kuar isêt angkan îte reh loiin ki om a, Bâi iboi ṭong thei ino angkan ki nit.

¹⁴A nit, mi ṭong reh thei ino,[20] A bâia ngona ṭong rêng rêng suak ngai ino angkah ki nit.

¹⁵O PUMAPA, nangmah nang ki iam a, O nangmah ki Puma ki Pathianin ne sâm ni ti.

¹⁶Ke râlhei khan ne riam no sela; Ke lîrnaah riloih no riseh.

¹⁷Ki îlîr lôk lôk a nit, Ki natna lak ki chungah a om maia.

¹⁸Ki sualnahei chu ken puang a; Ki sualnahei sikin ker ngai ai siat a nit.

¹⁹Ne doituhei chu an tamin an rât a; Dik ino taka ne neltuhei chu itam takah an nit.

²⁰Thil iṭha, thil ṭhanoa ne thunghei hih thil iṭha ker zûl sikin ke râl an nit.

²¹O PUMAPA, ne marak non la; O ki Pathian, ilah takah ne om pêk tlak no roh.

²²O PUMAPA, ki saninringtu; Ne ṭangpui rangin rimot roh.