Read Biete LAPUI 40 Bible Online

LAPUI 40 - Biete bible

LAPUI 40

¹Davida Inpâkna Lâ PUMAPA chu ki ngâk ngêi ngêi a; Khanchu, ki tiang â kuar a sung a, Ke samna chu a riat tâk a.

²Rimangna khur inthûk ata neh dialdôk riman tak ata chu a ne kâiisua tâk a. Khante, ki ke chu lungpui chungah ân chuang a, Ki kalbihei chu ân det tâk.

³Lâ thar ki bâiah a sia a, ei Pathian inpâkna lâ chu. Mi tam takkan amahih mûng an ta, ṭîng an ta, PUMAPA chu iam tâng an ti.

⁴PUMAPA iamtuhei chu an ham a ṭhat e, Mirmil tianga ngat ngai inoa, Pathian dikino chubai ûn ngai inohei chu.

⁵O PUMAPA, nangman kin ta rang thil rikhêl nî sin neh, Keimani tiang ni ngaituahei hih a tam tak tak a; Isîra inpuang rang ni tan lang, Tep zoin, ril zoi no ning, Nangma angkana hih tute zel omak e.

⁶Ribôlna neh thillan hih nuam mak che a; Hâlrivâm thillan neh sual ranga thillan khah zong mak che a, Khanêkan riatna rangin ikuar ni ne pêk a,

⁷Khanchu keiman, “Ringai ta, ki hong e, Lekhabu rizuatah khan ki thu riziak a nit a.

⁸O ki Pathian, ni lungdo sin hih ki lômna tak a nit a; Ni dân chu ki lungrilah a om mai,” ki ti a.

⁹O PUMAPA, ni mihei murdi inkhômna roinpuiah khan, Ni ne saninring tlia thurchi ṭha inpuang rangin, Mong loi chât loiin ril mai ki ti, iti ni riat.

¹⁰Ni saninringna thu ki lungril sungah thup ṭian mang a; Ni iamomna neh ni ṭangpuina thu chu ken puangdar a, Ni lungkhamlianna neh ni felna chu, Inkhômna roinpui taka mihei ziangah khan thup mang e.

¹¹PUMAPA, ni ṭhatna chu ki rangin thloi non la, Ni lungkhamlianna neh ni iamomna khan ne sunghual mai riseh.

¹²Thil ṭhano tep zoi loi khan a ne hualvêl a; Ki siatnân a ne môk a, mu thei riai mang, Ki lua samzâi nêkan khom a tam ual a; Khanchu, ki lungril ân dôp tâk a.

¹³O PUMAPA, ringaiihoi takkan ne sanisuan la; O PUMAPA, ne ṭangpui rangin rimot roh.

¹⁴Ki ringna inrimang ituma zongtuhei chu, Mualinphoi neh lunginzîngin om riseh.

¹⁵Ohôi! Ohôi! ne tituhei chu, An mualinphoi sikin thlavâiin om riseh.

¹⁶Nangma zongtuhei murdi chu nangmaah râiifân tak neh ilôm takkan om sela; Ni saninringna lômhei khan, “PUMAPA chu a roinpui vang na,” ti mai riseh.

¹⁷Keimah chu inriang neh risam tak ki nit a; Nikhomseh, PUMAPA khan a ne ngaitua ngai a. Nang chu ne ṭangpuitu neh ne saninzôktu ni nit a, O ki Pathian, ne ṭangpui rangin rivuak khâi no roh.