Read Biete LAPUI 44 Bible Online

LAPUI 44 - Biete bible

LAPUI 44

¹Kora Naipahei Lâ O Pathian, khuansianga an dam lâia ni sinthohei kha, Ki chibulhein an ne ril a, kin ibengin kin riat a.

²Nangman ni kut ngêiin nam tin chu ni ûmisua a, Ni mihei chu an ramah ni phun inding tâk a; Nam danghei chu deng nen theia, Nangma mihei chu vâng nen sak a.

³Nangma mihei khan ram hi anmani khandaia an ilâk ni mak a, Anmani bânzâla nêna an ichang khom ni mak, An chungah ni lôm sikin, Nangma kut chang ritha rât neh ni bânzâl neh, Nangma ompuinaah khan nêna an ichang a nit ual.

⁴Nang chu ki Pathian neh ki Rêng ni nit a; Nangman ni mihei ziangah nêna ni pêk a.

⁵Nangma ritha sikin ne doituhei chu kin indal phar a; Nangma riming sikin ne saraihei chu kin ichîl neng a nit.

⁶Zôkna rangin ki phelngul iam mang a, Ki khandai khomah ringat mang e.

⁷Ne doituhei ata chu nangman ni nen zôk a; Ne neltuhei chu nangman lunginzîng takkan nen om tâk.

⁸Tiklâi khomin Pathian chu song mai kin ta, Kumkhuan ni ziangah lômthu ril mai kin ti.

⁹Nikhomseh, atûn chu nangman ni ne heng a, inuaisian ni nen om tâk a; Kin sipaihei ziangah lak fe sa ngai khâi mak che a.

¹⁰Kin irâlhei ata lâizâm ni nen tho a, Ne doituhei khan kin neinun chu an inuam nuam an lâk a.

¹¹Bera angkana that rangin ni ne phal a; Nam tin kârah ni ne chekindar tâk a.

¹²Ni mihei hih itlôm takkan ni zuar a, Anni chu lutna zel nei ino angkan ni be a.

¹³Nangman kin vêla mihei sîrinsiatin ni nen om a, Anni khan ne phengsanin an ne nuiso a.

¹⁴Nangman nam tin lâiah a siatna tiang rikhînaah ni nen om a; Mi tin lâiah nuizabûrin kin om tâk.

¹⁵Ki mâimôkna hih sûn isôtkah ki makungah a om a; Mualinphoina hin a ner khû zoi tâk a.

¹⁶Ne doituhei neh ne neltuhei musit êsêlna ṭong iria sikah khan.

¹⁷Hihei murdi hih kin chungah tlung khom seh, Nangmah chu nang ringil mang ung a, Ni thuthlung khom iseh mang ung a.

¹⁸Kin lungril hi pêt mak a; Kin kalchôina hin ni lampui chu mah tlak ngai mak.

¹⁹Nikhomseh, nangman sihalhei lâiah rianginvâi takkan ni ne mâk a; Izîng inthim richelchit kârah ni ne thla tâk a.

²⁰Kin Pathian riming kin ringil a, Ram dang pathian chubai kin ûnin chu,

²¹Nangman mu suak ngêt ni ti; Nangman kin ngaituana rithuphei khom nî riat riai a nit.

²²A nit, nangma sikin sûn tin ithatin kin om ngai a; Bera ithat rang angkana be kin nit.

²³O PUMAPA, har ta roh, ithôm nî in mai? Meng inla, kumkhuakan chu ne thla no roh.

²⁴Îtho sik im ni mâi nî thup khap? Ithôm kin dengthei tlia neh ngêpsia kin tuang zia hih ni irngil hi?

²⁵Kin ringna hih rinêng isikin â khûn ṭian a; Kin takpum lak nuaiah â tâl ṭian tâk a.

²⁶Thoi inla, ne ṭangpui roh; Ni lungkhamlianna sikin ne saninring roh.