Read Biete LAPUI 45 Bible Online

LAPUI 45 - Biete bible

LAPUI 45

¹Kora naipahei inpâkna Lâ: Rêng rinei nî-a lungrithlung lâ an isak ngai Ki lungril chu thu ṭha tak takhein a sip liam zut zut a, Rêng rang lâ ki phua lâiah khan, Lekha riziak ithiam tak pen angkan ke lei hih la thuhein arthluk a.

²Nang chu miriam naipahei murdi nêkan khom ni mêl a ṭhat ual bîk a; Lungkhamna ṭong ithlum chu ni bâiah isia a nit a, Khasikin, Pathianin kumkhuan ṭhat nang ai vur a nit.

³O Rêng inthang, ni khandai kha ni kongah vong roh; Roinpui neh enihoi takkan rithluk roh.

⁴Thutak neh roirêl dikna hoi rangin, Ni roinpuinaa rithlukin itluang takkan sakor chungah chuangin fe thiai mai inla; Khanchu, ni râtna khan nêna roinpui tak nang pêng a ti.

⁵Ni thalhei chu arzum var a, Rêng idoituhei lungmuah khan an iver ngai a; Mi tin chu ni ke nuaiah an ilîr ngai.

⁶Pathianin nang ai pêk ni rêngṭhungmun chu kumkhuakan om mai a ta; Thleibîk nei nona rêng irol chu ni ram irol nîng a ti.

⁷Felna chu nen lut a, siatna chu ni nel a; Khasikin, Pathian, ni Pathian khan, Ni rualhei nêkan riak nang a înrithun, Râifânna nang ai pêk bîk a nit.

⁸Ni silbom murdi chu Mura neh Aloe nam neh thîngthal â nam vang a; Saihaheia inrivo Rêng inheiah perkhuang neh seranda, Chi dang dang irîhei hin nang an înlôm ngai a nit hih.

⁹Ni nupang iṭhahei lâiah khan rênghei nainuhei an om sa a; Ne changtiangah khan ofir rângkachaka rivo rêngnu kha â ding a.

¹⁰O Rêng nupui, ringai inla, ngaituan la, ne kuar sung roh; Ni mihei neh ni pa inmihei chu ringil roh.

¹¹Khanchu, Rêngin ni mêl iṭhatak hi idîng a ta; Ani chu ni puma a nit a, a makungah ikhûn riam roh.

¹²Tura mihei khan thilpêk hong chôi an ta; Mi richong tak takhei khan ni ditsakna ngên an ti.

¹³Rêng ina rêng nainu om chu a ṭhat vang na! A zakorfual chu rângkachak zâi rimia siam a nit.

¹⁴A zakorfual zia enihoi tak ihâkin ani chu Rêng ziangah an hong ṭhui a, A cham nungâkhei khan an zui a, Anni khan a ziangah an ṭhui a.

¹⁵Râifân neh ilôm takkan an hong a, Rêng inah khan an lût a.

¹⁶O ki Rêngpa, naipa itam takkah nei ni ta, Ni pahei rêng nitna la hong ithûl rang chu, Anni chu rammual pumpuiah inlalin siam ni ti.

¹⁷Ki la phua hin ner ming chu suanpâr itam takka riatmai rangin siam a ta, Khanchu, mi tinin kumkhuantluangkan nang chôiinrisâng an ti.