Read Biete LAPUI 49 Bible Online

LAPUI 49 - Biete bible

LAPUI 49

¹Kora naihei inpâkna Lâ Mi tinrênghei o, amahi ringai unla; Rammuala om murdihei o, nin ikuar sung rei.

²Mi chîn neh mi lian; Richong neh inriang khomin ringai rei.

³Ki bâi hin vârna thu isîr a ta; Ki lungril ngaituana chu riatthiamna thu nîng a ti.

⁴Thuvârheiah ke kuar sung ki ta; Seranda ât pumin a thu omziahei chu rilfiang ki ti.

⁵Lungzîng lâiin indôp no ning a, Ke râlhei pualoina khan a ne hualvêl lâiin ṭi tlak no ning.

⁶Kha mihei khan chu an richongnaah an ringat a, An richon khah an isong ngai a nit.

⁷A dik takkan, tutên mahni khom ritlan thei no nia, Pathian ziangah an ringna ritlanna man khom peh thei no nih.

⁸Miriam ringna ritlanna man chu ilutak a nit a; Tiklâi khomin pe tluk thei no nih.

⁹Thlânah mual khum loi a, A ring mai theina rangah khan.

¹⁰Mi vârhei khom an thi a mu a, Mi intlo neh mi inmôlhei angkah ngirin an thi ngai a, An richon chu mi dang ziangah an mâk ngai.

¹¹Ramhei chu an rimingin lei hual khom sela, An thlân chu an kumkho in a nit a; Tiklâi khoma an omna mun a nit.

¹²Miriam chu a roinpuina khan thina ata inzôk thei mak a; Ramsa angkan a lai thi ngêt rang a nit.

¹³En ta u, mahni ringota riiam pamhei chunga tlung soh; Mahni richon ringota lung itlukhei mongna soh.

¹⁴Ithat rang bera angkah an nit a, Thina chu anni vêngtu nîng a ti. Mi felhei chu an chungah inlal an ta, An taksa rimang zel a ta; Seol chu an omna in rang a nit.

¹⁵Nikhomseh, ki ringna chu Pathianin Seol thuneina ata ritlan a ta; Ani khan ne lôm a ti.

¹⁶Mi, a hong richong tîr tîr a, A insung a hong roinpui tîr tîr khomin ṭi no roh.

¹⁷A thi tikah îte ipêl thei nei no ni a; A roinpuina khom khan zui no nih.

¹⁸A dam lâiin hamṭha riti khom sela, A lotlukna sikin mihein inpâk man sela;

¹⁹A chibulhei murdi ziangah thinaah khan zom a ta, Tiklâi khoma ivâr mu khâi ino ranghei ziangah khan.

²⁰Mi a roinpuina khan thina ata inzôk thei mak; Ramsa angkan a lai thi ngêt rang a nit.