Read Biete LAPUI 5 Bible Online

LAPUI 5 - Biete bible

LAPUI 5

¹Davida Inpâkna Lâ O PUMAPA, ki ṭongheiah hin ne kuar ne sung pêk inla, Ki ngaituana hi ner ngai pêk roh.

²Ki rêng neh ki Pathian, Ke khêkrôl hi ringai roh. O PUMAPA, ni ziangah kî ṭongṭai a nit.

³O PUMAPA, zîngah hin ki rôl ringai inla; Nîsa suaka ki ṭongṭaina lan hi sâmna ki lei ingâk a nit.

⁴Siatna lôm ngai Pathian ni mak che a; Ni makungah sualna om phal ngai mak che.

⁵Mi lârripâkhei chu ni mitmuah ngîr thei no ni a; Mi siahei murdi chu nî nel ngai a nit.

⁶Mi lêmsiahei chu nen rimang ngai a; PUMAPA khan mi tôksolhei [2] neh mi mînlakhei chu â tir ngai.

⁷Nikhomsela, kei chu ni lungkhamlianna sikin ni inah hong lût ki ta; Nangma maritin ni Biak In rithiangah chubai nang ûn ki ta, Ni maah ikhûn ki ti.

⁸O PUMAPA, ke râlhei sikah hin ni felnaah khan ne kâiruai inla; Ni lampui chu ki matonah intlûn thal roh.

⁹Ke râlhei chu an bâiah khan iamomna zel omak a; An lungril khom siatna sip a nit. An rôl chu ithlân ri-ong a nit a; An ileiin rilêmna thu â sîr ngai.

¹⁰O Pathian, annihei hih thiamno inchang inla, Anmani thu phanhei ngêi chu an rimangna chang pêk riseh. An siatna tam takka sik neh ni chungah an rihel sikah hin, Ni mitmu ata ûm isua pai roh.

¹¹Nangmaa an iamna ringat murdihei chu lôm an ta; Tiklâi khomin râifânin lâ sak thei an ti. Nangmah lung nang ithlungtuhei khah ihoih inla; Nangma sikin an ilôm tak tak ngai a nit.

¹²PUMAPA, mi felhei chu ṭhatvur inla; Anni chu ipho angkan ni lungthlungnan ihual vêlin ihoi roh.