Read Biete LAPUI 50 Bible Online

LAPUI 50 - Biete bible

LAPUI 50

¹Asafa inpâkna Lâ Pathian Tinrêngthothei, PUMAPA khan thu â sîr a; Rammual pumpui, nisua ata nithlâk idênin a koi a.

²Zion, khopui enihoi taka rithokin Pathian chu a vâr suak tâk a.

³Ei Pathian chu zuang a ta, dâirek no nih; A maton tiangah khan meichok luai luai a ta, A vêlkah khan rua neh phâivua râng a ti.

⁴A mihei roi a rêl theina rangin; Rinêng neh rivân hih riatpuitu rangin koi a ti.

⁵Ani khan, “Ki mi rithlanghei, ki ziangah hong ribûm rei; Ribôlna thillana ki zianga thu thlungtuhei chu,” a ti a.

⁶Rivânhei khin Pathian felna chu an inpuang a, Amah ngêi chu roirêltu a nit.

⁷“Ki mihei o, ringai unla, thu ki îsîr rang a nit; O Israel, nang inrianfel ki ti, Keimah hi Pathian, ni Pathian ki nit hih.

⁸Nangma ribôlna sikah khan nang ngo mang a, Ni hâlrivâm thillan chu ki maah a om mai.

⁹Ni in ata sechal nang mang e, Ni ran rikul ata kêlchal khom iham no ning e.

¹⁰Rammuala ramsa tinrêng hi ki ta kêng, Mual tina ramsa lênghei khom hih ki ta kêng an init.

¹¹Chungavuang iva murdi khom ki ta an nit a; Rama mîring murdi khom ki ta an nit.

¹²Ki vonṭâm man sela nang iril no ning, Rinêng neh a sunga om murdi hih ki ta kêng an init.

¹³Serâtchal sa fan, kêlhei thisen ki in ngai im a?

¹⁴Pathian ziangah lômthu sîr ribôlna chu lan inla, Ân chungtaka zianga ni ṭonginkung murdi chu len roh.

¹⁵Lungzîng nikhuaah khan ne koi inla; Nang sanisuang ki ta; khanchu, nangman ne chôiinrisâng ni ti,” a ti a.

¹⁶Nikhomsela, mi siahei ziangah chu Pathian khan, “Ithôm ki thupêkhei nin îsîr? Ithôm ki thuthlung nin iching?

¹⁷Inriseina nin nel a, ki thupêkhei nin nôl a.

¹⁸Inru nin imu kah rual nin richanpui a, Inrê ngaihei lak nin ripôlpui a.

¹⁹Tiklâi khomin sualna thu ril rangin nin rifo ṭian a, Milak tho loi rangin nin bâi itik nuam mak chei a.

²⁰Nin iṭhung a, nin suapuihei nin sêl a; Nin inzirpuihei ngêi chu nin dem a.

²¹Kha thilhei murdi khah nin tho a, Nikhomsela, nangni ki dâi pêk rêk a, Khasikin, nangmani angkah ringotin nin ne be a. Khannisela, atûn chu nangni ki ngo a, Nin makungah nin idik nona chu ki înlang tâk a nit.

²²Nangni Pathian ringiltu hei o, amahih ringai ta u; Khanonchu, nangni sânphor ki ta, Nangni saninzôk rang tute zel om no nih.

²³Tukhom lômthusîr ribôlna lan kan an ne chôiinrisâng a, Khante, ki thu zômhei chu saninring ki ti,” ai ti a nit.