Read Biete LAPUI 51 Bible Online

LAPUI 51 - Biete bible

LAPUI 51

¹ Davida Inpâkna lâ: Bathsebi a châipui zoia zânthla Nathana a ziangah a hong lâia mi O Pathian, ni lungkhamlianna sikin lung nen kham inla, Ni mi zâna liantak sikin ki sualhei hi thâi inrimang roh.

²Ki siatna hih ner sûnfâi pêk inla; Ki sualna ata nen fâi liai roh.

³Ki siatnahei hih ki riat tâk a; Ki sual hih ki maah ai om mai a nit.

⁴Ni chungah, ni chung bangah thil kî thonsual tâk a nit, Nangma mitmuah thil isual ki sin tâk a; Khasikin, thiamno ni nen changnaah hin ne dik a, Ni roirêlnaah hin sêlna boi ni nit.

⁵Ringai ta, pualoinaa hong iseilian ki nit a; Ki nu sunga rithoka suala inzir ki nit.

⁶Ringai ta, sungril tianga takna ne dit a; Khasikin, ki lungril inthûk takah hin vârna nen risei roh.

⁷Ki sualnahei hih infâi [23] inla; khanchu, fâi ki ta; Ner sun la; khanchu, vur nêkan vâr ki ti.

⁸Râifânna neh lômna chu nen rian la; Khanchu, ki ru ni îkhiakhei hih râifânin lôm nôk thei a ti.

⁹Ki sualhei ata ni mâi thup inla, Ki siatnahei murdi thâi inrimang roh.

¹⁰O Pathian, keimaah hin lungril rithiang tak siam inla, Ki sungah hin rithla dik tak siam inthar nôk roh.

¹¹Ni ziang ata hih ne pai non la; Nangma rithla rithiang hih ne lah pêk no roh.

¹²Ni saninring lômna chu ne peh nôk inla; Nangma thu zôm nuam rangin ne siam roh.

¹³Khanchu, mi siahei kha ni thupêkhei inrisei ki ta, Nangma tiang hong ngat an ti.

¹⁴O Pathian, nangmah ne saninringtu Pathian, Thisen isuahei ata ne sanisua roh. Khanchu, ke lei hin ni felna thu râifân takkan inpuang a ti.

¹⁵O PUMAPA, nangman ki mûr hih iong inla; Khanchu, ki bâi hin nang inpâkna sak suak a ti.

¹⁶Ribôlna chungah lômna nei mak che a, Ni no sela chu nang pêng ki ti. Hâlrivâm thillan chungah lunghoina zel nei mak che a.

¹⁷Pathian nuamlam ribôlna chu rithla lunginsia[24] hi a nit a; O Pathian, lungril peiintem neh insîr ngôi ngôi chu heng tlak no tin.

¹⁸O Pathian, ni lungdo angkah takin Zion chungah thil iṭha thon la; Jerusalem kulpui chu inding nôk roh.

¹⁹Khanchu, idik takka ribôlnahei chungah lômna nei tâng ni ta, Hâlrivâm thillan neh pumka hâlrivâm thillan chungah khan; Khanchu, ni mâichâm chungah khan sechalhei lan tâng an ti.