Read Biete LAPUI 55 Bible Online

LAPUI 55 - Biete bible

LAPUI 55

¹Davida Lâ O Pathian, ki ṭongṭaina hih ringai inla, Lungkham ki ngênnaah hin rithup tlak no roh.

²Ner ngai pêk inla, ne sâm roh; Ki lungzîng sikin zâmzalin ke rung a.

³Ne doituhei rihu sikin neh mi siahei ngêpsiana sikhein. Anni khan buaina ki chungah an ithlun a; Ningthikin an ne nel a.

⁴Ki sungah hin ki lungril a nat bâk bâk a, Thina inrît khan a ne del a.

⁵Ṭina neh rilônthingnan a ne bô a, Thlavâinan a ner khû zoi tâk.

⁶Khanchu, “O, vaṭhu angkan vuang thei inlang, Vuangpat ki ta; thlangam takkan om ki ta,

⁷A nit, ilah takah ilêng ki ta, Ramkârah om ki ti.

⁸Thlipui neh phâivopui hih, Ribîkna muna lûtin kî zôk vang rang pial,” ki ti a.

⁹O PUMAPA, ke râlhei thiltum chu iseh pêk inla, An ilei chu inkhir pêk roh. Khopuiah khan ringona neh risualna ki mu a,

¹⁰A sûn a zânin khopui chu an vêl an vêl a; A sungah khan rithatna neh buaina a om a.

¹¹Siatna a sungah a om a; Ngêpsiana neh lêmna khan a tolâi chu ai sip a nit.

¹²Ne sîrinsehtu khah ke râl ni sela chu, Kî tuang thei rang a nit. Ki chunga risongtu khah ne neltu ni sela chu, Ki irbîk pêk thei rang a nit.

¹³Khannisela, nangmah ni lei nit a, keima angkah dôra kî be, Ki rual, ki rualṭha le le ni lei nit a.

¹⁴Ṭong ithlum takkan munkan ei chiar ngai a, Pathian Biak Inah ripôlin munkan ei lêng ngai kha.

¹⁵Ne doituhei chu an zoro tluk man thina khah an chungah zuang tlung sela, Famkhuah khan an iring pumin lût riseh. An inah neh an lâiah siatna ai châm mai a nit.

¹⁶Keiman chu Pathian ke sam a; PUMAPA khan nen zôk a ti.

¹⁷Zîng tin, kholoi tin, sûn lâiah khom, Ki lungril sôlna thu isîrin a ziangah ke rung a; Khanchu, ani khan ki rôl ringai ngêt a ti.

¹⁸Râltuk bual ata chu ki ringna hih thlangam takkan inzôk a ta; Ne doitu itam takkahei ata chu.

¹⁹Pathian, khuansiang ata rêngṭhungmuna ṭhungah khan, Ringai ta, anni chu intlôm a ti; An danglam nuam no sik neh Pathian an ṭi no sikin.

²⁰Ki malpa khan a malhei chungah a kut â lek a; A thuthlung â siat tâk a.

²¹A ṭongbâi suak chu dût riak angkan arnâl a, A lungril chu nelna sip a nit. A thuhei chu siriak nêkan arnâl ual a; Nikhomseh, khandai nêkan a sun innat ual ngai.

²²Ni puakrik chu PUMAPA chungah ringat inla, Khanchu, aman râtna nang pêng a ti; Mi fel chu tiklâi khomin an inîng phal no nih.

²³Nikhomsela, O Pathian nangman, Anni chu rimangna khurah khan iṭhul ni ta, Thisen isua ngai mihei neh mi lêmsiahei chu, An damsung ritenkah khom ring no nih. Keiman chu nang iam mai ki ti.