Read Biete LAPUI 56 Bible Online

LAPUI 56 - Biete bible

LAPUI 56

¹ Davida Inpâkna Lâ: Filistiahein Gath khuaah amah an man lâia mi O Pathian, lung nen kham roh, Mihein an ne sirde a; Sun isôtkah ne doituhein an nuam an ne lo a.

²Ke râlhein sûn isôtkah an ne doi a, Ripâk takka ne doituhei hih itam takkah an nit.

³Ker thlavâi zoro fengin, PUMAPA Tinrêngthothei, ni chungah ker ngat a.

⁴Pathian ki iam a, ṭi no ning e; Pathian thu chu song mai ki ti. Miriam chanlamboihein im an ne lo thei rang?

⁵Sûn thluanin ki ṭonghei an lâk inkôi ngai a; An ngaituana murdi chu ki ṭhat nona rang tiang korong a nit.

⁶Mun infiarah an ribuka, ki kalchôina tinah an mit an nen zui a, Ki ringna ila tumin an îruang ṭian a nit.

⁷Khasikin, O Pathian, an sualna chu thung inla; Ningthikin anni chu intlôm roh.

⁸Nangman ke vâina murdi ner chik tap a; Ki mitrithli ṭulhei khom hih ni mu riai a.[25] Ni lekhabuah ai chuang khai ni mak im a?

⁹Nang ki koi tikin chu, Ne doituhei chu lâizâm thông an ti; Pathian chu ki tianga ṭang a nit iti kî riat a nit.

¹⁰Pathian thu chu song ki ti, A nit, PUMAPA thu chu song ki ti.

¹¹Pathian ki iam a, ṭi no ning e. Miriamin im an ne lo thei ranga?

¹²O Pathian, ni zianga ki ṭonginkung chu len ki ta; Lômthu sîr ribôlnahei chu ni ziangah lan ki ti.

¹³Ki ringna hi thina ata nen zôk tâk a, Ki kehei hih riphêt loi rangin nen det tâk a. Khasikin, Pathian maah ki lêng thei a; Mi â ringhei chunga vâr ngai ivârah khan.