Read Biete LAPUI 58 Bible Online

LAPUI 58 - Biete bible

LAPUI 58

¹Davida Inpâkna Lâ O roirêltuhei,[26] thudik chu nin isîr ngai im? Mihei chungah roi dik nin rêl ngai im?

²Rêl ngai mak chei. Nin lungrilah khan thil ṭhano thona rang bang nin ngaitua ngai a, Rinêng chungah nin kuthei chu ritôk rihêmna tiang bang nin phar ngai.

³Mi siahei chu an nu sunga rithok zelin an fen sual tâk ngai a; An suaka rithokin milak thu tiang an îthlêk tâk ngai a nit.

⁴Irûl angkan tûr an nei a; Rûlriha kuar isêt angkan an ikuar an hup ngai.

⁵Khasikah khan rûl inlâm ngaihei he ringai ngai mak a, Rûl dôithiam takhei dôi sak khom ringai ngai mak.

⁶O Pathian, an hâhei kha itling pêk inla; O PUMAPA, sakeibaknei vânglâi ha ngaih tak takhei chu ikhiak pêk roh.

⁷Anni chu tui irât takka luang angkan luang pai sela; Loisûl angkan isir polin ṭuai riseh.

⁸Anni chu kôngkoroi angkah hin rôp sela; Naite changrisam ivâr rêng rêng mu no angkah ni riseh.

⁹An riat ma ngêiin, anni chu loisûl angkan isâtin om sela; An ringlâi ngêiin Pathian khan, A ningthikna rikhêl takin sêm inrimang riseh.

¹⁰Mi felhei khan mi sualhei chunga kuttum itlung khah, An mun mi dikhei khah lôm an ta; Mi sualhei thisen khah pâl an ti.

¹¹Khanchu, mihein, “Mi felhei khan loman an idong tâk a nit; Rinêngah hin roirêltu Pathian ai om titak a nit hih,” tîng an ti.