Read Biete LAPUI 59 Bible Online

LAPUI 59 - Biete bible

LAPUI 59

¹ Davida Inpâkna Lâ. Saulan mi a tir a, ama that ranga an iruang lâia mi O ki Pathian, ne doituhei ata ne saninzôk inla; Ne suksuanhei ata nen zôk roh.

²Isia sintuhei ata nen zôk inla; Thisen isua ngaihei ata ne sanisua roh.

³O PUMAPA, ki siat sik ni loiin, Ke sual sik khom ni ual loiin; En ta, ki ringna hih an iruang ṭian a, Mi nunterhei chu ne doi rangin an irbûm a nit.

⁴Ke sual no khomin ne doi rangin an risiam a; Thoi inla, ne san rangin zuang inla, nangmah ngêiin en roh.

⁵O PUMAPA, Tinrêngthothei Pathian, Nang chu Israelhei Pathian ni nit a, Nam danghei hi kuttum itho rangin thoi inla; Vârrilet takka châng ngai mi sualhei hih lung inkham viat no roh.

⁶Kholoi tiang an hong ribûm nôk a, Uihei angkan an irung a, Khopui sungah an rivâk vêl ngai a.

⁷Ringai ta, an bâiin an ne ngik a, An ilei chu khandaihei angkah a nit a; Tûm ne reh rang an ti ngai.

⁸Nikhomsela, O PUMAPA, Nangman anni chu ni nuiso ngai a; Nam tinhei chu ni nuiso ngai.

⁹O nen râttu, nang chôiinrisâng ki ti; O Pathian, nang chu ki kulpui ni nit.

¹⁰Ki Pathianin a lungkhamliannah khan ne don a ta; Ki Pathianin ne doituhei tlômna chu nen mûng a ti.

¹¹O Pathian, anni chu that no roh, Khanonchu, ki mihein an ringil duai lôiin. O PUMAPA, kin ipho tak, Ni sinthotheinan ichek indar inla, intlôm roh.

¹²An bâi chu sualin a sip a, an thu sîr khom sual korong a nit; An ripâkna ngêiah khan iôk riseh. Vâni risâm a, milak itho an song rai tâk.

¹³Anni chu ningthikin inrimang inla; An om khâi nona rangin inrimang phar roh. Khanchu, Pathianin Jakobhei chungah roi rêl a ta, A roirêlna chu kôlkil idênin a nit iti reh khai riseh.

¹⁴Ke râlhei chu kholoi tin an hong ribûm nôk a, Uihei angkan an irung a, khopui sungah an rivâk vêl ngai a.

¹⁵Anni chu ifah rang izongin an rivâk an rivâk mai a; An khop tôk an mu non chu an irung ngai.

¹⁶Nikhomsela, keiman chu ni râtzia thu hih lan sak ki ta; A nit, zîng tin ni lungkhamlianna thu hih râifân takkan sak ki ti. Nang chu ki kulpui risâng, Ki thlavâi nikhuaa ker bîkna ni lei nit ngai.

¹⁷O nen râttu, nangma inpâkin zâi ki ta; O Pathian, nang chu ki kulpui risâng ni nit a, Ki chunga lungkhamlianna nei Pathian ni nit.