Read Biete LAPUI 65 Bible Online

LAPUI 65 - Biete bible

LAPUI 65

¹Davida Inpâkna Lâ O Pathian, Zionah khan nang kin inpâk rang pial a nit; Kin ṭonginkung chu ni ziangah len kin ti.

²O ṭongṭaina ringai ngaitu, Mi tinrêng ni ziangah an sualna sikin hong an ti.

³Kin sualnahein ne nê ngai khom seh; Nangman ni ne ngaidam ngai a.

⁴Mi, ni mun rithianga om ranga ni irthlang a, Ni Ina om ranga nî tihei chu an ham a ṭhat e. Ni In ṭhatnaheiah khan khop kin ta, Ni Biak In rithiang ṭhatna ngêiah khan.

⁵O nen ringtu Pathian, Ne sanisua nan thil rikhêl takhei ithon ni ne sâm a. Nang chu kôlkila mi murdi neh, Tuikhanglian râl ilah taka omhei rinpui ni nit.

⁶Ni râtnan itlânghei nen ding indet a, Ni sinthotheizia ni înlang a nit.

⁷Tuikhanglian irî vung vung hei, A tui rifôn irî vung vung hei, Mipui rihel but but khom nen dâi a.

⁸Kôlkomong idêna omhei khomin, Ni sintho rikhêlhei khah arkhêl an ti a. Zîng neh kholoi hong itlung khan lômna a hong ithlun ngai.

⁹Rinêng hih ni ngaisak a, ruatuiin ne fa a, Nen ṭhat a, irî nen nik a; Vadunghei chu tuiin nen sip a. Rinêng hih ama angkah khan ni siam inrifûk zoin chu chimu ni pêk ngai.

¹⁰Loimahei chu ruatuiin ne fa inkhop a, tuiin ne chia a; A hârbihei chu nen zor a, Khanchu, chimu ṭoihei kha ṭhat ni vur ngai.

¹¹Kum chu ni ṭhatna nen khum a; Ni fena lampuihei chu thil iṭhan a far ngai.

¹²Ramchâra ran lêngna munheiah a far a, Itlânghei khom râifânnan an sip ngai.

¹³Mualtlânghei chu bera rualhein an dâp a; Phâihei chu buhein arkhû khap a, Tinrêng râifâna khêkin, lâ an isak ngai a nit.