Read Biete LAPUI 66 Bible Online

LAPUI 66 - Biete bible

LAPUI 66

¹La: Inpâkna Lâ Rammuala om murdihei o, Pathian inpâkin râifân takkan ipâi rei.

²Arming roinpuizia chu lâhein sak suak unla; Roinpui takkan inpâk rei.

³Pathian ziangah, “Ni sinthohei chu ân rît vang na! Ni sinthotheina chu a natinsat a, Nangma doituhei chu ni makungah la khûn an ti.

⁴Rammuala om murdihein chubai nang ûn an ta; Nangma inpâkin zâi an ta, Ner ming inpâkin zâi an ti,” ti rei.

⁵O hong unla, Pathian sinthohei hih en ta u; Miriamhei lâia a sintho hih ân rît a nit.

⁶Ani khan tuikhanglian chu rinêng iṭôl ân chang a; Ei chibulhei khan tuipui chu ken an kâi a, A sintho sikin amakhan a chungah ei ilôm tak tak a nit.

⁷A sinthotheinah khan kumkhuakan roi a rêl a, A mitin namhei chu a en ṭian a; Rihel ngaihei kha mahnin ripâk no riseh.

⁸Mi tin hei o, Pathian chu inpâk unla; Ama inpâkna rî chu rikhông riseh.

⁹Ani khan a nen ring mai a. Ei kehei hi riphêt phal mak e.

¹⁰O Pathian, nangman ni ne fia a; Tangkarua rithît angkan ni ner thît a.

¹¹Nangman chângah ni nen ôk a; Kin dârah hin puak irik tak ni bâng a.

¹²Mihei chu kin lu chungah nen chuang a; Mei neh tui lian kin pâl thleng a; Nikhomsela, atûn chu nangman mun inṭumah ni ne ṭhui tâk a.

¹³Hâlrivâm thillanhei ichôiin ni inah lût ki ta; Ki ṭonginkunghei chu ni ziangah len ki ti.

¹⁴Lungzînga ki om lâia, Keima bâi ngêiin nang pêng ki ti, ai tihei khah.

¹⁵Ran vâiinthâi hâlrivâm thillan chu ni ziangah lan ki ta, Berachal kha ni mâichâma hâl rangin lan ki ta, Serâtchal neh kêlhei khom ni ziangah lan ki ti.

¹⁶O hong unla, Pathian iṭitu murdihei o, ringai rei, Ki ta ranga a sinthohei chu nangni ril ki ti.

¹⁷Ani chu iring takkan ke sam a; Ke leiah hin inpâk lâ ai sip a nit.

¹⁸Ki lungrilah sualna thup ki nitin chu, PUMAPA khan ki thu ner ngai pêk no nih.

¹⁹Nikhomsela, PUMAPA khan ki thu a ner ngai pêk tâk a; Ki ṭongṭaina chu a ner ngai pêk tâk.

²⁰Pathian chu inpâkin om riseh. Ani khan ki ṭongṭaina lo nen sam pêk mak a, Ki chunga a lungkhamliana chu dâi ual mak.