Read Biete LAPUI 68 Bible Online

LAPUI 68 - Biete bible

LAPUI 68

¹Lâ: Davida Inpâkna Lâ Pathian chu a thoi a, â râlhei chu â chekindar a, Ama neltuhei khom kha a makung ata lâizâm an tho zoi tâk.

²Meikhû a îlêng rimang ngai angkan anni chu an ilêng rimang a; Khuailu chu mei iluma ai zôi ngai angkan, Mi siahei chu Pathian makungah an rimang tâk.

³Mi felhei chu ilôm takkan an om a, Pathian makungah an lim a; A nit, râifân takkan an lôm tâk.

⁴Pathian inpâkin lâ sak unla, arming inpâkin zâi rei, Sûm chunga chuangtu rangah khan lamilian siam unla; Arming chu PUMAPA[28] a nit a, A makungah khan lôm rei.

⁵A mun rithianga om ei Pathian chu, Pa nei inohei pa a nit a, Numeihei khom â donsui ngaitu a nit.

⁶Pathian khan mi lêngivâihei chu omna in a pêk a, Mi tânghei chu a ṭhui isua a, Vângsaknaah a ṭhui inlût ngai. Khannisela, mi rihel ngaihei chu ram iṭôlah ân om ngai.

⁷O Pathian, ni mihei ma ruai a, Ramchâr ni pâl thleng lâiah khan,

⁸Ni makungah chu rinêng hih â nîng dur dur a, Rivâna rithokin rua a zuang sûr a, Sinai tlâng ilua khom Pathian makungah, Israelhei Pathian makungah khan chu a înîng dur dur a nit.

⁹O Pathian, nangman rua itam takkah nen sûr a, Ni dongtum, ram ipôn tâk chu nen ṭhat nôk tâk a.

¹⁰Ni mihein amakhan om mun an khuar tâk a; O Pathian, ni ṭhatna sikin inrianghei rangin ni înrifûk pêk a nit.

¹¹PUMAPA khan thu a pêk a, Nupang itam takkan an ril indar a;

¹²“Rênghei neh an sipaihei chu lâizâm an tho, lâizâm an tho,” itin. Insunga om nupanghei khan râllâk thilhei chu an risem a.

¹³Risual lâia ritap kôla lei izâl ṭianhei khom khan, Vaṭhu rilim, tangkaruaa tuam, Arthla môr rângkachaka tuamhei kha an dong a.

¹⁴Tinrêngthotheian rênghei â chekindar lâiah khan Zalmon tlângah [29] ivur â ṭhul a.

¹⁵Basan tlâng [30] hi itlâng inthang tak a nit, Itlâng risâng tak tak ai nei zuak a nit.

¹⁶Ne tlâng risâng tak takheia rithokin, A omna ranga Pathian irthlang tlâng hih, Ithôm narsa taka nin ien mai hi? PUMAPA chu amakhan kumkhuakan ai om mai rang a nit.

¹⁷Pathian tâli[31] chu sâng itam takkah neh khan, Sinai tlânga rithokin a mun rithiangah khan, PUMAPA chu a zuang tâk e.

¹⁸Ani chu chungtiang a lui a, Ai manhei chu suakin a ṭhui a; Miriamhei ata thilpêkhei a dong a, A nit, rihel ngaihei khomin an hong lan a; Amakhan PUMAPA Pathian chu om tâng a ti.

¹⁹PUMAPA chu inpâk rei, Ne saninringtu ei Pathian hin, Nin tin ei puak irikhei a ne ipêl pêk ngai a nit.

²⁰Ei Pathian chu saninringtu Pathian a nit a; PUMAPA ei Pathian chu thina ata nen zôktu a nit.

²¹Pathianin ama doituhei lu chu ikhoi a ta, Pualoi taka om maituhei luvun isa takhei chu.

²²PUMAPA khan, “Basan rama rithokin, Nin irâlhei chu hong ṭhui nôk ki ta, Tuikhanglian iṭuang inthûk taka rithokin hong ṭhui nôk ki ti.

²³Khanchu, an thisen kha sirpol nin ta, Nin uihei khan an nuam dôrkah iliak an ti” a ti a.

²⁴O Pathian, mi murdîn roinpui taka ni fe lâi khah an mu a, A mun rithiang ipana ki Rêng, ki Pathian fe lâi kha.

²⁵Lâsak pôlhein ma an iruai a, Nungâk khuangte suktuhei khan an zui a, A nung takah irîhoi itumhei an fe a.

²⁶“Mipui inkhômnaah khan Pathian inpâk unla, O Jakoba richihei, PUMAPA chu inpâk rei,” an ti a.

²⁷A nam iroitak Benjamina namhei chu ma ruaitu an nit a, Khanung Juda nam ruaituhei neh an lômahei; Zebulun neh Naftali ruaituhei khan an zui nôk a.

²⁸O Pathian, ni sinthotheina chu inlang inla; Kin ta ranga ni sinthotheina mang kha inlang roh.

²⁹Jerusalem khuaa ni Biak Ina rithokin, Rênghein thilpêk nang an hong pêkna muna rithokah khan.

³⁰Lâiluang bila om ngai sarâng Aigupta khû ngon la, Nam dang, serâtchal neh serâtte lômhei chu ngo roh. Ikhûna an tangkahei ni maah an lan mâkah chu, Risual bang inuam mihei khu chekindar roh.

³¹Aigupta rama rithokin palâi hong an ta; Ethiopiahei[32] chu an kut Pathian tianga phar rangin rimot an ti.

³²Rammuala rêng ram murdihei o, Pathian inpâkin lâ sak unla; O PUMAPA inpâkin zâi rei.

³³Khuansiang ata om rivân chunga chuangtu kha, Rôl iring takkan â khêk e, ringai rei.

³⁴Pathian sinthotheizia inpuang suak unla, A roinpuina chu Israelhei chungah a om a, A râtna chu vânlâizôla om a nit.

³⁵Pathian chu a mun rithianga rithokheiah khan iṭi ai om a nit; Israelhei Pathian chu. Ani khan a mihei chu râtna neh sinthotheina a pêk ngai. Pathian chu inpâkin om riseh.