Read Biete LAPUI 69 Bible Online

LAPUI 69 - Biete bible

LAPUI 69

¹Davida Inpâkna Lâ O Pathian, ne saninzôk roh; Tuihei khan ki ring idênin an ne vol tâk a.

²Dialdôk inthûk tak, sirbi rang rêng rêng omnonaah ker nîk tâk a; Tui inthûk takah ki om tâk a, Tui rifôn khan a ne ichîm rang tâk a nit hih.

³Ṭangpui ingêna ke khêknan ki sôl tâk a; Ke danghei khom a châr zoi tâk a. Ki Pathian ithlîrin ki mit â vâi zoi tâk.

⁴Chanlamboia ne neltuhei lak ki samzâi nêkan an tam a; Dikino taka ne doia nen rimang itumhei chu mi rât tak tak an nit a. Ki îrûk tlak ino khom an ne înthung a nit.

⁵O Pathian, nangman chu ken tlôkzia hi ni riat riai a; Ki sualnahei khom hi ni maah chu rithup viat mak.

⁶O PUMAPA, Tinrêngthothei Pathian, Keima sikin nangmaa ringattuhei chu mualinphoiin in-om no roh. O Israelhei Pathian, keima sikin nangma zongtuhei chu inzak no roh.

⁷Nangma sikin sîrinsian ki om a, Izakin ki mâi arkhû zoi tâk.

⁸Ki suapuihei lâiah khualmi angkah ki hong nit tâk a, Ken zirpuihei lâiah riatloi mi angkah ki nit tâk.

⁹Ni In ta ranga ki ṭhatnemringaina khan a ne man khap a; Nang an isîrinsiatna kha ki chungah a ṭum tâk a.

¹⁰Ki ṭap a, bu ki ngei lakin, Amakhah mi ne musitna a chang a.

¹¹Borapuan ki sil lakin, An ne nuina rang ringot a chang a.

¹²Kul kotbâia ṭhunghein [33] ki chungchâng thu an isîr a; Zûnruihei khan lâhein an ne phua a.

¹³Keiman chu, O PUMAPA, ni ziangah ṭongṭai ki ta, Nangma zoron kungah ne sâm roh. O Pathian, ni lungkhamlian natinsat tak sikin neh, Ni saninringna ṭonginkung sikin ne sâm roh.

¹⁴Dialdôk ata hih ne sanisuan la, nen rinîk tlak no roh; Ne doituhei ata neh tui inthûk tak ata hi ne saninzôk roh.

¹⁵Tui ilian khan ne chîm inrimang no sela; Tui inthûk takin ne vol inrimang no riseh, Thlân khur khomin a bâiah ne khum ipip no riseh.

¹⁶O PUMAPA, ne sâm roh, Ni lungkhamlianna chu a ṭhat a; Ni lungkham ṭhatna angkah takin ki tiang ma song roh.

¹⁷Ni bôi ata hi ni mâi thup non la, Ki lunginzîng tâk a, ne sâm vak vak roh.

¹⁸Ne zuang nâi inla, ner tlan zel inla; Ne doituhei ata ne sanisua roh.

¹⁹Mi ne sîrinsiat dânhei hi ni riat riai a, Ki mualinphoi dânhei, ki mâimôk dânhei hi ni riat a; Ne doituhei khom nî mu riai a nit.

²⁰Mi ne êrona hin ke lung a sun a, Iṭha takkan ki bei a dong a. Lungkhamna ki tûng a, tute lakin lung nen kham mak a; Thlangam ne sak rang ki zong a, tute lak mu mang a.

²¹Ki vonṭâm lâiin thil ikhâ an ne pêk a; Ki tui rihâl lâiin uain thûr an ne pêk a.

²²An ruaiṭhe chu an ilîrna rang châng ni pêk sela; An ribôlna ruaiṭhe chu an rimangna rang chang pêk riseh.

²³An mithei chu inzîng pêk inla, îte mu thei no riseh; An konghei chu inthing pêk diai riseh.

²⁴Ni lunghoinona chu an chungah bun inla; Ni ningthikna khan anni chu man riseh.

²⁵An omna chu hong ram sela, An puan inheiah khan tute om no riseh.

²⁶Nangman kuttum nî thohei khah an nuam an lo a; Ni îphophei lungdûk tongzia khah an isîr an isîr ngai a.

²⁷An sualnahei ritik tap inla; Ni saninringnaah rangtum zel nei no riseh.

²⁸Ringna lekhabu ata an riming thâi inrimangin om sela; Mi felhei lâiah riziak inlût sa ni no riseh.

²⁹Kei chu denginthei neh lungdûk itongin kî om a nit a; O Pathian, ne san inla, mun risângah nen om roh.

³⁰Pathian riming chu inpâkin zâi ki ta; Lômthu sîrin amah chu chôiinrisâng ki ti.

³¹Ran manih, serâtchal, riki neh tin inei manih, Ilan nêk khomin amakhan PUMAPA chu inlôm ual a ti.

³²Ngêpsia tuanghei khan amakhah mûng an ta, lôm an ti; Nangni Pathian izongtuhei o, Nin lungril chu thor inhar riseh.

³³PUMAPA khan ṭangpui ringaihei chu arngai pêk ngai a, A nit, a mi tânghei chu musit ngai mak.

³⁴Rinêng neh rivân hei, Pathian inpâk rei, Tuikhanglian neh a sunga omhei khan inpâk rei.

³⁵Pathian khan Zion chu sanisuan, Juda ram khuahei chu inding nôk a ti. A mihei chu amakhan om an ta, ram chu lua zel an ti.

³⁶A suak richihei khan luang an ta; Arming inlutuhei chu a sungah om an ti.