Read Biete LAPUI 71 Bible Online

LAPUI 71 - Biete bible

LAPUI 71

¹O PUMAPA, nangma chungah ki hong ribei; Tiklâi khomin mualinphoiin nen om no roh.

²Ni felna sikin ne ṭangpui inla, ne sanisua roh. Ki tiang ne kuar sung inla, ne saninzôk roh.

³Ki rang ribîkna lungpui nin la, Ki zôkna rang kulpui risâng tak ni roh.[34]

⁴O ki Pathian, mi sia kut ata ne sanisuan la, Mi fel ino neh mi nunter kut ata chu.

⁵O PUMAPA, nang chu ki tûngna tak ni nit a; Ki naipangte ata ker ngatna chu ni nit.

⁶Ki nu sung ata ki suak nî-a rithokin ki rinpui tak ni nit a; Ki nu sûl ata ne lah suaktu ni nit. Nang inpâk mai ki ti.

⁷Ki ringnun hih mi tam takka enrikhîna a nit a; Nikhomsela, nang chu ki zôkna det tak ni nit.

⁸Ki bâi hi nangma inpâknan a sip a; Sûn isôtkah nang chôiinrisângnan a sip mai ngai.

⁹Ki tar nungah hin ne heng non la; Ker tha a ṭuai tenah hin ne mah no roh.

¹⁰Ne doituhei khan ki chungrichân thu an isîr a; Ki ringna ruangtuhei kha an rirôl a.

¹¹Anni khan, “Pathianin a mâk tâk; Tho rizûl ei ta, lei man ta rei, Tute lak ân zôk rang om khâi mak a” an ti a.

¹²O Pathian, keima rithokin ilavitah om tlak non la; O ki Pathian, ne ṭangpui rangin rimot roh.

¹³Ne doituhei chu mualinphoiin neh inrimangin om sela; Ki siatna rang izongtuhei chu isîrinsian neh mâimôkin rikhû riseh.

¹⁴Keiman chu nangmah bang tûng mai ki ta; Nang inpâk ual ual ki ti.

¹⁵Ki bâi hin ni felna thu inpuang a ta; Sûn thluanin ni saninringna thu ril a ti, A tamzia chu ki riat phâk ban ni khom sela.

¹⁶PUMAPA, Pathian sintho roinpui tak hi inpâk ki ta; Ni felna, nangma felna bang hi inpuang ki ti.

¹⁷O Pathian, ki naipangte lâi ata nangman ni nen risei a, Atûn tenan ni sintho rikhêlhei chu ken puang mai ngai.

¹⁸O Pathian, ki tar a, ke ba a ṭuak tenan khom ne marak non la; Ni roinpuizia neh ner thaneizia hi, Rual ithar la hong ivâng thiai maihei ziangah, Ken puang mâkah chu ne ompui roh.

¹⁹O Pathian, ni felna khan rivân khi a sun a; O Pathian, thil roinpui takhei ni sin ngai a, Nangma angkana hi tute zel omak e.

²⁰Dengtheina neh lungzîngna itam takkah ni nen tuang a; Khanniseh, nangman râtna tharin nen rithluk nôk ni ta, Thlân khur inthûk ata ne ṭhui isua nôk ni ti.

²¹Nangman roinpui nôk ualin ne siam ni ta; Thlangam ne sak nôk ni ti.

²²Perkhuang neh nang inpâk ki ta; O ki Pathian, ni iamomna ngêi chu inpâk ki ti. O Nangmah, Israel Mi rithiang, Seranda neh nang inpâkin zâi ki ti.

²³Nangma inpâka ki zâi tikin, ki bâi chu lôm a ta; Ki ringna, nî saninring hi lôm tak tak a ti.

²⁴Ke lei hin sûn thluanin ni felna thu ril a ta; Ki siatna rang izongtuhei laka chu mualinphoiin an izak tâk a.