Read Biete LAPUI 72 Bible Online

LAPUI 72 - Biete bible

LAPUI 72

¹Solomona Inpâkna Lâ O Pathian, ni roirêl thiamnahei chu rêng hi pen la; Ni felna khom peh sa roh.

²Khanchu, ni mihei chu felnan roirêl pêk a ta, Ni mi inrianghei roi khom idik takkan rêl pêk thei a ti.

³Mihei ta rangin itlânghei khan vângsakna ithlun sela, Mualhei khan felna ithlun riseh.

⁴Rêng khan mi inrianghei chu idik takkan roirêl pêk sela; Ṭangpui ringaihei san sela, Ngêpsetuhei rêk chu siririal chit riseh.

⁵Inî neh ithla a vâr sung kârkah chu, Ni mihei khan suanpâr itam takka dênin chubai nang ûn mai riseh.

⁶Rêng chu loisûl rinoi chunga rua sûr angkah ni sela, Rinêng ifâtu ruatui angkah ni riseh.

⁷A damsung kârkah felna chu thuar indon sela, Ithla khi a vâr sung kârkah chu ṭhatvurna chu pung mai riseh.

⁸A rêngram chu tuikhangliana rithoka tuikhanglian idênin ni sela, Eufratisa rithoka kôlkomong idên ni riseh.

⁹Ramchâra omhei chu a makungah ikhûn sela; Ama doituhei chu rinêngah ibok riseh.

¹⁰Tarsis rênghei neh tuihuala rênghein thilpêkhei hong chôi sela; Arab rêng neh Seba rênghei khomin thilpêkhei hong lan riseh.

¹¹Rênghei murdi chu a makungah ikhûn sela; Nam tinrêngin a sintho riseh.

¹²Mi inrianghein an isamin ân zôk ngai a, Ṭangpuitu nei inohei khom ân zôk ngai.

¹³Mi inriang neh ṭangpui ringaihei lung ân kham a; Isan ringaihei ringna ân zôk ngai.

¹⁴An ringna chu ngêpsiana neh nunterna rithokin artlan ngai a; An thisen chu ama mitah khan ilu tak a nit.

¹⁵Rêng kha dam sôt riseh. Seba ram rângkachak chu amah ipe ni riseh; Mihein ani chu ṭongṭai pêk mai sela, Pathian ṭhatvurna chu a chungah om mai riseh.

¹⁶A ramah ifâk vâng sela; Itlângheiah khan bu ri-âi zun sela; A vuihei chu Lebanon rama buvui angkah ni riseh. Ram iṭhaah loisûl ai bit ngai angkan khuaheiah khan mihei bit riseh.

¹⁷Arming chu kumkhuakan dâi no sela; Inî khi a vâr sungkah chu arming inthang mai riseh. Mihei chu ama sikin ṭhativurin om sela, Nam tinin ani chu hamṭha ti riseh.

¹⁸PUMAPA, Israelhei Pathian chu inpâkin om riseh. Amah bangin sinrikhêlhei a sin ngai a.

¹⁹Arming roinpui tak chu kumkhuakan inpâkin om sela; Rammual pumpui hi a roinpuinan sip riseh. Amen, Amen.

²⁰Jesaia naipa Davida ṭongṭaina chu a mong tâk.