Read Biete LAPUI 73 Bible Online

LAPUI 73 - Biete bible

LAPUI 73

¹Asafa inpâkna lâ Pathian chu Israelhei chungah a ṭhat vang na, Lungril rithianghei chungah khan.

²Nikhomsela, kei chu ki kehei hi arphêt lôk lôk a, Ki sirbihei hi artol lôk lôk ngai.

³Mi pualoihei vânneizia ki mun, Mi risonghei ker zuk a.

⁴Natna zel tuang mak a; An taksa chu a damin a rât a.

⁵Mi danghei angkan denginthein omak a; Mi danghei angkan lunginzîngin om ual mak.

⁶Khasikin, ripâkna chu rithei angkan an ilî a; Nunterna chu puansil angkan an sil a.

⁷Takna sikin an mit â vung a, An lungril khom siatnan a sip a.

⁸Mi an nuiso a, isual takkan ngêpsiana thu an ril a; Ripâk ngitkan an ṭong a, Mihei ngêpsiana rang an ngaitua ngai a.

⁹Chunga Pathian khom an bâiin an isîrinsiat a, An ilei khomin rammual hi arfang sua ngai.

¹⁰Khasikin, Pathian mihei ilua khom an ziangah an kîr nôk a; Annihei siatna khah mu loiin an iti murdi an izoipui ngai.

¹¹Anni khan, “Pathianin ingkam a riat rang? Ân chungtakah khan riatna zel ai nei mani?” an ti a.

¹²En ta, hihei hih mi siahei chu an nit hih; Ihoi taka om maiin an richong tîr tîr a.

¹³Ke lunghei ki înrithiang a, Ki kuthei sêlnaboia ki irsûk hih â tlong im ai nit hi?

¹⁴O Pathian, sûn isôtkah nuam lo tuangin ki om a; Zîng tin ni ne sôina kut idelin kî om a nit.

¹⁵Kha angkah khan ki lei iti ni selan lak chu, Ni mihei richi chungah dik ino tak isin nîng ki ta.

¹⁶Amakhah ki riat thei rang tlia ki ngaitua lakin, Ki ta rangin a întak a nit.

¹⁷Khanniseh, Pathian mun rithiangah ki fe tenan chu, Mi siahei mongna rang chu ki riat thiam tâk a.

¹⁸A dik takkan, anni chu mun rinâl takah ni sia a; Siatnaah ni pai iṭhul ngai a.

¹⁹Mitkhap kârka sungin inramin an om tâk a; Inrît takkan inrimang riai an init tâk a nit.

²⁰Zâna rimang khua a vâra ai boi ngai angkan, O PUMAPA, nangmah ngêi ni thoi tikin chu rimang riai an ti.

²¹Ke lung hi dûk a tong a, Ki lungril khom sun ikhoi angkan a om a;

²²Mi inmôl, îte riano ki nit a, Nangma tiang vâng chu ramsa angkah dôr ki nit a.

²³Nikhomsela, ni ziangah ki om mai a, Nangman ki kut changtiang ni ne tûk a.

²⁴Nangma roisak lamin ni ne kâiruai a. A nungkhôn takah chu roinpuina a khin ne la lôm ni ti.

²⁵Rivânah khin nangma banah tûm kî nei? Rinêngah khom nangma ti no chu ki îdit tute zel omak.

²⁶Ki taksa neh ki lungril hi arzal tâk a, Nikhomsela, Pathian chu kumkhuaka ki lungril râtna a nit a; Amah chu ki tinrênga tinrêng a nit.

²⁷Ringai ta, nangma nang iphialhei chu rimang an ta; Nangma chunga iamom inohei chu inrimang ni ti.

²⁸Keima rang rêkin chu Pathian inâi hih a ṭhat a; PUMAPA Pathian chu ki zôknan ki mang a; A sintho rikhêlhei murdi hi inpuang mai ki ti.