Read Biete LAPUI 74 Bible Online

LAPUI 74 - Biete bible

LAPUI 74

¹Asafa inpâkna lâ O Pathian, ithôm ni ne iheng tlak tâk hi? Ithôm ni ran vâina muna berahei chungah hin ni ningthik ai khûk mai tak?

²Khuansiang ata ni mihei inih ranga ni înran, Ni ta rang bîka ni irtlan namhei kha remai inla; Ni omna ngai Zion tlâng khom hi remai roh.

³Â seh rip tâk chu hang rifang ta, Irâlhei khan ni mun rithianga thil tinrêng an isiat chit tâk a.

⁴Nangma doituhei chu ni mun rithiangah khan an ikhêk dur dur a; An ritlekhei chu nêna entîrnan an târ a.

⁵Rampui thing iphûr rang angkah takin, An reipui kha an ilek fur a.

⁶Khanchu, thinga isin enihoi murdihei chu, Reipui neh chungchôihein an isiat vang a.

⁷Ni mun rithiang chu an isim a, an hâl a; Ner ming omna mun chu an inbor chit tâk a.

⁸An lungrilah khan, “Isehchit ei ti u,” an ti a. Hi rama Pathian biakna mun murdi chu an hâl zoi tâk.

⁹Kin nam richiknahei chu imu rang om khâi mak a; Zânthla rêng rêng khom om khâi mak a, Itena sôt im hingkan kin iom rang iti â iria rêng rêng lak, Kin lâiah om khâi mak.

¹⁰O Pathian, itena sôt im ne doituhei khan nang an iphengsan rang? Irâlhei khan ner ming hih kumkhuan an imusit rang mani?

¹¹Ithôm ni kut nî kâi nôk? Ithôm ni kut chu nungtiang ni îsui mai?

¹²O Pathian, khuansiang ata ki Rêng ni nit a; Rinênga ni mihei saninring ngaitu ni nit.

¹³Nangman chu ni râtnan tuikhanglian kha ni ṭhen a; Nangman chu tuipui sunga rûlpuihei lu chu ne khoi a.

¹⁴Nangman Leviathan luhei[35] chu ne khoi chit a, Ramchâra omhei [36] fâk rangin a sa khah ni pêk a.

¹⁵Nangman chu tuinârhei neh tuipûthei nen pût suak a; Nangman chu tuipui iluanghei nen kang a.

¹⁶Sûn hi ni ta a nit a, zân khom hi ni ta a nit; Nangman inî neh ithla chu an omna munah ni sia a.

¹⁷Nangman rinêng ramrî murdi ne rît a; Nangman fûr neh ṭhâl nen om a.

¹⁸O PUMAPA, amahih remai roh, Irâlhei khan nang an nuiso a, Pathian ngaisak ino mihei khan ner ming an îsîrinsiat ngai a nit.

¹⁹Ni vaṭhu ringna hi ramsahei ziangah peh tlak non la; Ni mi inrianghei ringna hi kumkhuakan ringil tlak no roh.

²⁰Ni thuthlung kha remai roh, Ram sunga mun inthim takhei chu nunternan a sip zoi tâk.

²¹O, mi ngêpsia tuanghei chu mualinphoiin in-om non la; Inrianghei neh farahei khan ner ming inpâk riseh.

²²O Pathian, zuang thoi inla, nangma thu chu idingpui roh. Pathian ngaisak ino mihein sûn tin nang an îsîrinsiat hi remai roh.

²³Ne râlhei ningthik ikhêk rôl hi ringil tlak non la, Nangma doituhei irî lum vung vung chu a hong irkhông mai ngai a nit.