Read Biete LAPUI 75 Bible Online

LAPUI 75 - Biete bible

LAPUI 75

¹Lâ: Asafa Inpâkna Lâ O Pathian, ni ziangah lômthu nang kin ril, Ner ming chu a nâi sikin lômthu nang kin ril. Ni mihein ni sinrikhêl roinpui thuhei chu an ril ngai.

²Pathianin, “A zoro ki înkungah khan, Idik takkan roirêl ki ti.

³Rinêng neh a sunga om murdihei inîng riai khom seh, Keimah ki nit a chopui iphûm indettu chu.

⁴Mi lârripâkhei ziangah khan, ‘Ripâk khâi no rei,’ ki ti a; Mi pualoihei ziangah khan, ‘Risong khâi no rei,’ ki ti pêk a.

⁵‘Rivâna omtu chungah risong no rei, Ring-ôn inrisângin ṭong suat suat no rei,’ ki ti pêk,” a ti a.

⁶Sak neh thlanga rithokin manih, Sim neh mâra rithokin manih, Roirêlna hih hong tlung ual no nih.

⁷Roirêltu chu Pathian a nit; Ani khan ṭhenkah ân tlôm a, Ṭhenkah a chôiinrisâng ngai.

⁸PUMAPA kutah khan kuri khah a om a, A ningthikna uain chu a phûl bur bur a. Amakhah a bun suak a, rinênga mi siahei khan in infâi riai an ti.

⁹Keiman chu kumkhuakan Jakoba Pathian thu inpuang ki ta; Ani chu inpâk mai ki ti.

¹⁰Ani khan mi siahei thuneina chu ikhiak a ta, Mi felhei thuneina chu inpung pêk a ti.