Read Biete LAPUI 78 Bible Online

LAPUI 78 - Biete bible

LAPUI 78

¹Asafa la phua O ki mihei, keima inriseinaah hin nin ikuar sung unla, Ki bâia thuheiah hin nin ikuar sung rei.

²Ṭongrikhekin ki bâi âng ki ta, Tianlâia ṭong ulianhei kha sap suang ki ti.

³Ei ikuar khoma ei iriat tâk neh ei lungril khoma ei iriat tâk, Ei chibulhei khomin an ne îril tâk kha.

⁴Khahei khah ei naihei ziangah khom ip no min a; Rual ithar la hong iom ranghei ziangah PUMAPA sintho roinpuihei, A râtzia neh a sinrikhêl sinziahei kha ril mai ei ti.

⁵Jakoba richihei ziangah thupêk a pêk a, Israel mihei ziangah dân a pêk a; An richi suanpârhei irila inrisei mai rangin, Ei chibulhei kha thu ai pêk a nit.

⁶Rual ithar la hong iom thiaihei khan an risei thei a, Naipang la hong isuak ranghei khomin, An naihei an la hong iril nôk mai theina rangin.

⁷An iamna chu Pathianah an ringat thei a, Pathian sinthohei chu ringil loi a, A thupêkhei an zôm theina rangin.

⁸An chibulhei angkana tuklul ilian neh rihel ngai, Lungril det ino, Pathian tianga iamom loia an om nona rangin.

⁹Efraimhei chu râlthluka rivon phel neh thal an chôi a; Rituk nin chu lâizâm an tho a.

¹⁰Pathian Thuthlung zôm mak a, A dânah khom om nuam mak e.

¹¹A sinthohei chu an ringil a, A sinrikhêl an imuhei khom khah remai khâi mak.

¹²Aigupta ram Zoan phâiah khan, An chibulhei mitmua thilrikhêl takhei a tho pêk ngai a.

¹³Tuikhanglian chu a ṭhen phat a, anni chu varâl ân kâi a; Tuihei chu bang angkan ân risung inding ngut a.

¹⁴Sûnah khan sûmin â ruai ngai a, Zânah meiin â ruai ngai.

¹⁵Ramchârah khan lungpuihei â tôk inkak a, Tuipui tui angkana tam tui a pêk a.

¹⁶Lungpuia rithokin tui â sua pêk a; Tuihei chu vadung angkan a luang zut zut a.

¹⁷Khaangkan a nit khomin a chungah an la sual mai a, Ramchârah khan Chungnungtaka chungah an rihel a.

¹⁸Pathian an fia tâk a, An irzuk zuk ifâk an ngên a.

¹⁹A nit, Pathian an isîr inpor a, “Ramchârah hin Pathianin khalai ân rifûk thei im a?

²⁰Lungpui chu â tôk a, tuihei chu a zuang suak a; Tuihei chu a zuang luang zut zut ngêi a. Khanniseh, bu chu ne peh thei titak a tîm a? A mihei hi sa ai pêk thei rang chu a nit im?” an ti a.

²¹PUMAPA khan a lei riat a, a ning a thik tâk a; Jakobhei chungah khan mei a zuang chok a, Israelhei chungah a ningmurna ai thuar tâk a nit.

²²Pathian iam mak a, A saninring thei iti khom an iiam ino a nit.

²³Nikhomsela, chungtiang rivân khi thu a pêk a, Rivân inkothei khi â ong pêk a;

²⁴An fâk rang Manna khah an chungah ân sûr pêk a; Rivân bu chu ai pêk a nit.

²⁵Miriamhein vân angelhei bu an fâk a; An khop chitka rangin bu chu a pêk a.

²⁶Sak ithli chu rivânah ân râng a, A sinthotheinan sim ithli chu a ṭhui suak a;

²⁷Sa chu vâivut angkah dôran an chungah ân sûr pêk a, Iva rithla nei chu tuikhangliana ṭiai tep zoi loi dôran;

²⁸An riabuk tualah â ṭhul pêk a, An omna kôlvêlheiah khan.

²⁹Khanchu, an fâk a, an khop a; An irzuk tak kha ai pêk tâk a nit.

³⁰An bâiah sa ikhâi mai pumin, Inuara chiar bâng ual mak a.[40]

³¹Pathian an chungah a ning a thik a, An pasalṭhahei ṭhenkah a that a, Israel tlangvâl iṭhahei chu an thi zoi tâk a.

³²Khangkah dôran khom isia an la sin mai a, A sinrikhêl sinhei kha taksôn ual mak a.

³³Khasikin, an ringlâi sûnhei chu chanlamboiin ân boi pêk a, An damsung kumhei khom inrît takkan a boi tâk a.

³⁴Anmani a that ikipah amah chu an zong ngai a; Riletin an kîr nôk a, iṭha takkan Pathian an zong ngai.

³⁵Pathian chu an zôkna lungpui a nit iti an riat suak a, Anmani ritlantu chu Pathian Chungnungtakah a nit iti an riat a.

³⁶Nikhomsela, ani chu an bâi bangin an inpâk a; An ileiin milak an ril ngai a.

³⁷An lungril chu a tiang idik mak a; A thuthlungah khom iamom ual mak e.

³⁸Ani lak chu lungkhamnaa sip a nit sikin an pualoina kha â zâ a, Anni chu inrimang mak a; A nit, voi itam takkah a ningthikna â ṭhuai a, A ningmurna chu a îndâi nôk ngai a nit.

³⁹Â fam thei taksa bang an nit iti a riat mai a; Ithli râng vut angkah pai hi an nit a.

⁴⁰Ramchârah khan a chungah an rihel rizing a, Amah chu beidong an sak tam vang na!

⁴¹Pathian chu an fia an fia mai a; Israelhei Mi Rithiangah chu lungzîng an sak mai ngai a.

⁴²A sinthotheina kha remai nuam mak a, An irâlhei ata a saninzôkna kha remai nuam ngai mak e.

⁴³Aigupta ram Zoan phâia, A sinrikhêl sin roinpui tak tak kha remai khâi mak a.

⁴⁴An vadunghei chu thisen ân chang pêk a, An tuihei chu tutên in thei khâi mak a.

⁴⁵An lâiah ithoi [41] itam takkah a tir a, khahei khan an sê tâk a, Uṭok ân pung pêk a, khahei khan an ram an isiat pêk a.

⁴⁶An chimuhei khom ikhâihei ân fâk pêk a, An sinzong irâ chu an isiat pêk riai a.

⁴⁷An grep ruihei chu irial ân dêng inrinôi pêk a, An theipui kung khom ivurin a that pêk a.

⁴⁸An ranhei khom irial ân dêng that pêk a, An bera lômhei chu iṭêk ân dêng pêk a.[42]

⁴⁹A ningthikna inrît tak chu an chungah â ṭhum a, Lungzîng lungdongin ân om a, Khahei kha an siatna thlun ranga ai tir a nit.

⁵⁰A ningthikna iṭhuai mak a, An ringna chu thina ata zua ual mak a; An ringna chu ripuiin ân rimang pêk tâk a.

⁵¹Aigupta rama nâi lutîr murdi a that a, Hama [43] puan inheia an râtna râ masa takhei chu.

⁵²Khanchu, ama mihei kha bera angkan â ruai suak a, Bera lôm angkan ramchârah khan â ruai a.

⁵³Izôkriamkan â ruai a, anni khan îte ṭi mak a; Tuipui khan an irâlhei chu arkhû zoi tâk a.

⁵⁴Anni chu a ram rithiangah a hong ṭhui ithlun a, Hi tlângram, a kut ngêia ai lâk ramah hin.

⁵⁵Nam danghei chu an matonah a ûmisua a; An ramhei chu Israel namhei a khoi pêk a, An puan inhei chu Israel namhei ân lua a.

⁵⁶Pathian Chungnungtakah chu an fia nôk a, A chungah an rihel tâk a; A thupêkhei chu zôm ual mak a.

⁵⁷Nung kîr ithon, an chibulhei angkan vârrilet takkan an om a; Thal ruang ikôi angkan iamom loiin an kôi a.

⁵⁸An mirmil chubai ûnna munhein ani chu a ning an inthik pêk a; An mirmil siamhein a ning an inthik a.

⁵⁹Pathianin amakhah a mun a ning a thik a, Israelhei chu â tir tak tak a.

⁶⁰Khanchu, Silo [44] muna a Puan-In chu a mâk a, Miriamhei lâia a omna In chu a mâk tâk a.

⁶¹A Thuthlung Bôm chu ei irâlhei kutah ân man a, A roinpuina neh a sinthotheina risin ngêi chu.

⁶²A mihei chu khandaiin ân rivât a, An chungah khan a ning ai thik a nit.

⁶³An tlangvâlhei chu meiin a kâng inrivâm a, An nungâkhei khan pasal rang rêng rêng nei khâi mak a.

⁶⁴An thiampuhei chu khandaia inlîrin an om a, An numeihei khan isûn rêng rêng sûn ngam khâi mak a.

⁶⁵Kha lâi takah khan PUMAPA chu, Mi inrimu ata an ihar ngai angkan a har tâk a.

⁶⁶Â râlhei chu a ûm ikhîr a; Mualinphoi takkan ân om tâk a.

⁶⁷Josefa richihei chu a heng a, Efraim namhei khom rithlang khâi mak a.

⁶⁸Juda nam chu arthlang ual tâk a, A lungthlung Zion tlâng neh khan.

⁶⁹Ani khan a In rithiang chu rivâna a omna angkah khin a sin a, Kumkhuaka om rangin rinêng angkah hin a îndet a nit.

⁷⁰A suak Davida chu arthlang a, Bera lôm lâia rithokin a lâk suak a;

⁷¹Bera lôm ienkoltua rithokin a koi isua a, A dongtum Israelhei enkoltu rangin rêngin a phun tâk a.

⁷²Davida khan lungril iṭha tak riputin annihei chu a enkol a, Ithiam takkan ai kâiruai tâk a nit.