Read Biete LAPUI 80 Bible Online

LAPUI 80 - Biete bible

LAPUI 80

¹Asafa inpâkna lâ O Israelhei enkoltu, ne kuar ne lei sung inla, Bera lôm angkana Josefhei iruai ngaitu, Ne lei ringai pêk roh. Nangmah Cherubhei chunga ṭhung ni mêl ivâr chu,

²Efraim hei, Benjamin hei, Manase hei mitmuah zuang invâr suak roh. Ni râtna kha chok ithoi inla, Ne saninzôk rangin zuang roh.

³O Pathian, nen ding inthar nôk inla; Ni mêl ivâr kha nen mu nôk inla, Khanchu, saninzôkin om kin ti.

⁴O PUMAPA, Tinrêngthothei Pathian, Itena sôt im ni mihei ṭongṭaina chungah hin ni ning ai thik rang?

⁵Anni chu mitrithli kha bu angkan nen rin a, Mitrithli kha kilât ilian isipin nen in tâk a.

⁶Nangman kin vêla namhei chu kin ram richu risak a, Risualna rangin ni ne siam a; Ne doituhei khan an ne phengsan a.

⁷O Tinrêngthothei Pathian, nen ding inthar nôk roh. Ni mêl ivâr kha nen mu nôk inla, Khanchu, saninzôkin om kin ti.

⁸Aigupta ram ata kha grep kung ni hong chôi a; Namhei chu ni ûmisua a, ni phun tâk a.

⁹A phunna rang mun chu ner thial a; Inthûk takkan rizung a kâi a, Ram pumpui a dâp zit tâk a.

¹⁰Itlânghei chu a dâilîmin arkhû riai a; Â ṭanghei khan sidar kung ilianhei khom a dîp a.

¹¹Â ṭanghei chu Mediteranean tuipui idênin arzâm a, Sak tiang Eufratis vadung idênin arzâm tâk a.

¹²Ithôm arkulna ripalhei chu ne siat a? Thleng rilôi murdîn â râ an irmal tâk hi?

¹³Ram nuaia sangalhei khan an isiat a, Ramsahei khomin an fâk a.

¹⁴O Tinrêngthothei Pathian, ngaihoi takkan kin tiang ngat nôk roh. Rivâna rithokin ne zuk en inla; Ni grep rui hi en inla, zuang inzôk roh.

¹⁵Ni kut ngêia ni phun hi zuang inzôk roh, A nit, a ṭiak ni ranga ni înthuar ngêi hih.

¹⁶Kin irâlhei khan an rikit a, meiah an hâl a; Anni chu ni ningthik mêl khan inrimang riseh.

¹⁷Ni kut chu ni mi ditsakhei chungah ringat inla, Nam, ni rang piala ni înrâthei chungah hin.

¹⁸Khanchu, nung nang song tlak khâi no ning ung a; Nen har inla; khanchu, nangma riming rilam kin ti.

¹⁹O PUMAPA, Tinrêngthothei Pathian, nen ding inthar nôk inla, Ni mêl ivar khah nen mu nôk inla, Khanchu, saninzôkin om kin ti.