Read Biete LAPUI 81 Bible Online

LAPUI 81 - Biete bible

LAPUI 81

¹Asafa inpâkna lâ Pathian, râtna ne petu inpâkin râiifân takkan zâi unla; Jakobhei Pathian chôiinrisângin râiifân takkan zâi rei.

²Inpâkna lâ sak unla, khuangte hei, Seranda irîhoi tak hei, perkhuang hei neh inpâk rei.

³Thla tharah khan bekul tum unla; Thla lîr lâi, ei kût nî a khan.

⁴Amahih Israelhei tho ranga inkung a nit a; Jakobhei Pathian thupêk a nit.

⁵Aigupta ram arfang suak lâiah khan, Amahih Josefa richihei tho ranga a înkung a nit. Ki lai riat ngai ino rôl kî riat khan,

⁶“Nin dâra rithokin thil irik chu nangni ki lâk pêk tâk a; Nin puakhei chu nangni ken ringâk a.

⁷Nin lungzîng lâiin nin ne koi a, Khanchu, nangni ken zôk a. Rua neh phâivua, keima ribîkna rithokin nangni ki sâm a; Meriba tuiheiah khan nangni kî fia kha.

⁸O ki mihei, ringai unla, nangni inriang ki ti; O Israelhei, ki thu ringai nuam unla chu o!

⁹Ram dang pathian rêng rêng chu nin lâiah a om rang ni mak a; Nam dang pathian rêng rêng chu nin ikhûn rang ni mak.

¹⁰Keimah, PUMAPA nin Pathian chu ki nit, Aigupta ram ata nangni ruai isuatu chu ki nit. Nin bâi kha âng inrizat unla, ifâk nangni insip pêk ki ti.

¹¹Nikhomsela, ki mihei khan ki rôl ringai nuam mak a; Israelhei khan ki thu zôm nuam mak e.

¹²An lungril khir sikin ke thla tâk a, An nuam lam takkan ki în-om tâk a nit.

¹³O, ki mihei hin ki thu ringaiin, Israelhei hin ki lamheiah hin lôn sela chu o!

¹⁴An irâlhei chu intlôm zel ki ta, Anmani doituhei chungah khan ki kut ki îlek zel rang a nit.

¹⁵PUMAPA neltuhei chu a makungah inthingin ikhûn an ta; Kumkhuakan dengthei tuang an ti.

¹⁶Nangni chu bu tui takin nangni fâng ki ta, Lungpuia rithoka khuaituiin nangni inkhop ki ti,” a ti a.