Read Biete LAPUI 83 Bible Online

LAPUI 83 - Biete bible

LAPUI 83

¹Lâ: Asafa inpâkna Lâ O Pathian, ṭong loiin om no roh; O Pathian, dâirek non la, om ṭian no roh.

²Ringai ta, nangma doituhei chu an rihel but but a, Nangma neltuhei chu an tang rûn rûn a.

³Ni mihei hi vârrilet takkan an phiar a; Ni mi donsuihei chungah hin thil ṭhano phanin an rirôl a.

⁴“Tho rei, an nam rimang pharkan inboi ei ti u, Israelhei riming hih rimang thal ta riseh,” an ti a.

⁵Thu inrualin an rirôl a, Nangma doi rangin thu an thlung a.

⁶Edomhei neh Ismaelhei; Moabhei neh Hagarhei;

⁷Gebalhei, Amonhei neh Amalekhei; Tura khuaa om Filistiahei neh thu an thlung a.

⁸Asuria khom an tiang an ṭang sa a; Lota richihei chu an ṭangpui a.

⁹Midianhei chunga ni tho lam angkah khan thon la; Kison dunga Sisera neh Jabina chunga nî tho angkah khan tho roh.

¹⁰Kha mihei khah Endor khuaah nen rimang a, An ruakhei chu rinêngah a thûk zoi tâk a.

¹¹An milianhei chu Oreba neh Zeeba ni tho lam angkah khan thon la; A nit, an rênghei murdi chu Zebaha neh Zalmona angkah khan tho roh.

¹²Kha mihei khan, “Pathian dongtum ramhei chu lei lua pêk rei u,” an ti a.

¹³O ki Pathian, annihei chu thlisimin vâivut ai sêm inlêng ngai angkah hin sêm inlêng inla, Farsi ithlîn ai sêm inlêng ngai angkah hin om riseh.

¹⁴Meiin ram ai kâng angkan, Meichokin mual ai kâng angkah hin,

¹⁵Anni chu ni thlipui inrizûl inla, Ni phâivosimpuiin iṭhi roh.

¹⁶O PUMAPA, nangma riming an rilam theina rangin, An mâi inmôk pêk roh.

¹⁷Kumkhuakan mualinphoi neh lunginzîng takkan om sela; Izak takkan rimang riseh.

¹⁸Nangmah bang hi JEHOVA riming ripu, Rammual pumpui chunga Chungnungtak ni nit iti reh riseh.