Read Biete LAPUI 85 Bible Online

LAPUI 85 - Biete bible

LAPUI 85

¹Kora naipahei inpâkna lâ PUMAPA, ni ram chungah hin khoza ni nei a; Jakobhei chu vângisakin ni siam nôk tâk a.

²Ni mihei siatna chu ne zâ a, An sualna murdi ni ngaidam zoi tâk a.

³Ni ningthikna murdi chu ne ṭhuai a, Ni ningmurna chu nen dâi a.

⁴O ne saninringtu Pathian, Kin tiang mâi ngat nôk inla, Kin chunga ni ningthikna chu inboi ta roh.

⁵Kin chungah kumkhuakan ni ning ni înthik rang mani? Ni ningthik chu suanpâr murdi dênin ni înlang mai rang mani?

⁶Nangmaah khan ni mihei kin lim theina rangin, Ni ne înhar nôk khâi ino rang mani?

⁷O PUMAPA, ni lungkhamlianna chu nen mun la, Ni saninringna chu ne peh roh.

⁸PUMAPA Pathian thu sîr rang kha ringai ki ta; A mihei neh mi rithianghei ziangah thlangamna thu isîr a ti; Anni chu invêtna tiang kîr nôk khâi no riseh.

⁹A saninringna chu ama ṭituhei ziangah khan a om mai ngai; Ei ramah hin a roinpuina khom om mai a ti.

¹⁰Lungthlungna neh iamomna ritong an ta; Felna neh ringeina ritum an ti.

¹¹Rinênga rithokin iamomna chu hong ṭoi suak a ta, Rivâna rithokin felna khan zuk thlîr a ti.

¹²A nit, PUMAPA khan thil iṭha ne pêng a ta, Ei ramah hin fâknêk hong vâng a ti.

¹³Felna chu PUMAPA matonah fêng a ta, A fena rang lampui siam pêk a ti.