Read Biete LAPUI 86 Bible Online

LAPUI 86 - Biete bible

LAPUI 86

¹Davida ṭongṭaina O PUMAPA, ki tiang ne kuar sung inla, ne sâm roh. Inriang neh risam tak ki nit a.

²Ki ringna hi vong inṭha roh, Pathian ngaisak mi ki nit a; O nangmah ki Pathian, nangma iamtu ni bôi hi saninzôk roh.

³O PUMAPA, lung nen kham inla; Sûn isôtkah nang ke sam ngai hi te.

⁴Ni bôi ringna hi inlôm inla, O PUMAPA, ni tiang ringot ki ringna hin ai thlîr a nit.

⁵O PUMAPA, nang chu ni ṭhat a, izânan ni sip a, Nangma koituhei murdi chungah lungkhamlianna ni nei ngai a.

⁶O PUMAPA, ki ṭongṭainaah ne kuar sung inla; Lungkham ki ngênna rôl hi ringai roh.

⁷Ki lungzîng nî-ah khan nang ki koi a, Nangman ni ne sâm ngai a.

⁸O PUMAPA, nangma angkana pathian zel omak, Ni sintho angkana hi tute â sin zel omak e.

⁹O PUMAPA, nangma isiam nam tinrênghei hong an ta, Ni makungah ikhûn an ta, Nangma riming chôiinrisâng an ti.

¹⁰Nang chu ni roinpui a, sinrikhêlhei ni sin ngai a; Nangmah bang hi Pathian ni nit.

¹¹O PUMAPA, ni lungdo nen risei inla, Khanchu, ni thutakah lôn ki ta; Nangma riming iṭi mai rangin lungril rithiang nen nei roh.

¹²O PUMAPA, ki Pathian, ki lungril murdin nang inpâk ki ta; Nangma riming hi kumkhuakan chôiinrisâng ki ti.

¹³Ki chunga ni lungkhamlianna chu a roinpui a; Ki ringna hi mithi khua ata ni sanisua tâk a.

¹⁴O Pathian, mi lârripâkhei khan an ne doi a; Mi nunter lômhei khan ki ringna inrimang itumin an zong a, Nangmah nang ngaisak ngai ino mihei an nit.

¹⁵Nikhomsela, O PUMAPA, nang chu Pathian, Lungkhamna neh izânaa sip, lung idâi, Lungkhamlianna neh thutaka sip ni nit.

¹⁶O, ki tiang mâi ngat inla, lung nen kham roh; Ni bôi hi ni râtna pen la, Ni bôinu naipa hi saninring roh.

¹⁷Ki chungah ni ṭhatzia inlang inla; PUMAPA, nangman ni ne ṭangpui a, thlangam ni ne sak sikin, Ne neltuhei khan amakhah mu sela mualinphoiin om riseh.