Read Biete LAPUI 88 Bible Online

LAPUI 88 - Biete bible

LAPUI 88

¹Lâ: Kora pôlhei inpâkna lâ. Ezra mi Hemana la phua PUMAPA, ne saninringtu Pathian, Sûnah nang ke sam a, zânah ni makungah ki hong a.

²Ki ṭongṭaina hi ni maah hong tlung sela; Ki ṭap rôlah hin ne kuar ne sung pêk roh.

³Ki ringna hi lungzîngnahein a sip a, Ki ringna hi Seol a nâi teng tâk a.

⁴Thina thlân bâia ṭhunghei lâia tep sa ki nit tâk a; Râtna rêng rêng nei khâi ino mi ki nit.

⁵Mithi lâiah imarak ki nit tâk a, Irâlhein an ithat, thlân khura zâlhei angkah ki nit a, Kha mihei khah reh khâi mak che a, Ni kut ata khâi inrimang tâk an nit.

⁶Thlân khur inthûk takah ni ne pai iṭhul tâk a, Mun inthim tak neh inthûk takah khan.

⁷Ni ningthikna khan a ne del ngit a, Nangman ni tui rifôn murdi ni nen vur a.

⁸Nangman ki malhei chu ni ne khâi pêk vang a; An ranga tiriomin ni ne siam a. Ikhâr khapin ki om a, kî suak thei khâi ino a nit.

⁹Dengtheina sikin ki mit ritha khom a ṭuai tîr tîr a; O PUMAPA, nîn tin nang ke sam a, Ni tiang ki kuthei ki phar a.

¹⁰Mithihei ranga khan sinrikhêl nî sin rang mani? Mithi tâkhei khan ithoiin nang an înpâk rang mani?

¹¹Thlâna zâl tâkhei khan ni lungkhamlianzia an iril theiin, Rimangna tong tâkhei khan ni iamomzia an înpuang thei rang mani?

¹²Ni sinrikhêl sinhei chu mun inthimah khan imu thei ai nit mani? Iremai khâi inohei ramah khan ne dikzia hi ireh phâk ai nit rang mani?

¹³O PUMAPA, keiman chu nang ke sam a; Zîng tin ki ṭongṭaina chu ni ziangah a hong tlung ngai a.

¹⁴O PUMAPA, ithôm ni ne iheng tâk? Îtho tâk im nung ni ne isong tâk hi?

¹⁵Ki naipang lâi ata dengtheina ki tuang a, Ithi lôk lôk kan ki om ngai a; Ne sôina kuthei ituangin rizal neng kan ki om ngai a.

¹⁶Ni ningthik natinsat tak khan a ne dêng inrinôi a; Ni kuttum inrît takhei khan a nen rimang tâk a.

¹⁷Sûn thluanin tui ilian angkan an ne hualvêl a; Kil tinah an ne vêl vung a.

¹⁸Lung ne thlungtu neh ki rualṭhahei chu ni ne khâi pêk a, Izîng bang hi ki champui a nit tâk.