Read Biete LAPUI 89 Bible Online

LAPUI 89 - Biete bible

LAPUI 89

¹ Ezra mi Ethana la phua O PUMAPA, ni lungkhamlianna thuhei chu kumkhuakan lan sak ki ta; Ki bâiin ni iamomzia chu suanpâr murdi dênin inpuang ki ti.

²Ni lungkhamlianna chu kumkhuakan om mai a ta, Ni iamomna chu rivânhei angkah khin det mai a ti, iti ki riat a.

³Nangman, “Ki mi rithlang ziangah khan thu ki thlung a; Ki bôi Davida ziangah ṭong ken kung tâk a.

⁴‘Ner chihei chu rêng hong chang mai an ta; Ni rêngṭhungmun khom suanpâr murdi dênin hong lua mai an ti,’ ki ti,” ni ti a.

⁵O PUMAPA, rivânhei khin ni sinrikhêl sinhei an inpâk a; Mi rithianghei inkhômnaah ni iamomna hi an inpâk.

⁶PUMAPA, rivânah khin nangma tluk hi tute omak a, Rivân mihei lâi khomah nangma angkana tute zel omak e.

⁷Mi rithianghei inkhômnaah marit nang an tho a; An rêngkan ni makungah rilônthingin an iding ngai.

⁸O PUMAPA Tinrêngthothei Pathian, Nangma angkana ritha nei tûm â om? O PUMAPA, nangma angkana iamomnaa sip tûm a om?

⁹Tuikhanglian risok sûp sûp chungah roi ni rêl a; A tui rifôn richothei nen dâi ngai.

¹⁰Rahab [49] sarâng kha ne tôk a, ni that a; Nangma doituhei chu ne ban ritha râtin ne chekindar ngai.

¹¹Rivân khi nangma ta a nit a, Rinêng khom hi nangma ta a nit; Rammual neh a sunga om murdi hi nangma isiam korong an nit.

¹²Sim neh mâr chu nangma isiam a nit a; Tabor tlâng neh Hermon tlâng khan, Nangma riming inpâkin râiifân takkan an zâi ngai.

¹³Ni bânzâl ritha chu a rât vang na! Ni kut chu a rât a, ni kut changtiang vâng chu chôiinrisângin a om ngai.

¹⁴Ni rêngram chu felna neh diknaa inding a nit a; Lungthlungna neh thutak chu ni sinthona kipah inlangin a om ngai.

¹⁵La sak puma nangma chubai nang iûn ngai mihei chu an ham a ṭhat; Ni lungkham mêl ivâra lêng ngaihei chu.

¹⁶Nangma sikin sûn thluanin an lôm ngai a, Ni felna sikin nang an inpâk ngai.

¹⁷Nang chu kin râtna roinpui ni nit a; Nangma ditsakna sikin chôiinrisângin kin om ngai.

¹⁸Kin ipho hih PUMAPA ta a nit a; Kin rêng khom hih Israel Mi Rithianga ta a nit.

¹⁹Tianah khan ni mi rithianghei ziangah inlârnan thu ne sîr a, “Pasalṭha ta rangin ṭangpuitu ki siam pêk a, Mipui lâia ki irthlang isuaah chu ki chôiinrisâng tâk a.

²⁰Ki bôi Davida chu rêngin ki phun a; Siriak rithiang kha ken rithu tâk a.

²¹Ki râtna chu a ziangah om mai a ta, Ke bân ritha hin ani chu inrât mai a ti.

²²Â râlhei khan tiklâi khomin ngam no ni a; Mi siahei khan intlôm no nih.

²³Ama doituhei chu a makungah itôn lîr ki ta, Ama neltuhei chu that riai ki ti.

²⁴Ki iamomna neh ki lungthlungna chu a chungah inlang mai ki ta; Keima riming sikin chôiinrisângin in-om ki ti.

²⁵A rêngram chu tuikhanglian indên pêk ki ta, Mediteranean ata Eufratis vadung idênin inrizat pêk ki ti.

²⁶Ani khan, ‘Nang chu ki pa, ki Pathian; Ki saninringna lungpui ni nit,’ tîng a ti.

²⁷Khante, ani chu nai lutîrin siam ki ta, Rinêng rênghei lâia ân chungtakin siam ki ti.

²⁸Ki lungkhamlianna chu kumkhuakan a rangin vong inṭhâng ki ta, A zianga ki thuthlung chu indet mai ki ti.

²⁹Archihei chu kumkhuakan rêng inchang mai ki ta; A rêngṭhungmun chu rivân om tenah mong no nih.

³⁰Khanniseh, a naihei khan ki dân an zôm no a, Ki thupêk angkan an om no a,

³¹Keima inriseina an rikan a, Ki thupêkhei an vong inṭhat non chu,

³²An sualnahei sikin kuttum thông ki ta; An puanonahei sikin intuang ki ti.

³³Nikhomsela, ki lungthlungna chu Davida ziang ata lah pêk paih no ning a, Ki iamomna chu milaka chang rangin phal no ning e.

³⁴Ki thuthlung chu ikhiak no ning a, Ki bâia thu suak chu indanglam no ning.

³⁵Voikah keima riming rithiang ichinga ki înkung tâk kha; Davida chu ithla tlak ngai no ning e.

³⁶Richi suanpâr chu kumkhuakan nei mai a ta, A rêngram chu inî om tenah inding mai ki ti.

³⁷Ithla angkan kumkhuakan indetin om a ta, Rivâna riatpuitu iamom angkah khin,” ni ti a.

³⁸Nikhomsela, atûn chu nangman ni heng a, ni mâk tâk a; Ni siriak inrithu chungah khan ni ning a thik tâk a.

³⁹Ni bôi zianga ni lungthlung chu ni nôl tâk a; A rênglukhum chu rinêngah ni pai pêk tâk a.

⁴⁰A kulpui murdi chu ne sim a; A dâipui idethei chu ne siat tâk a.

⁴¹Lampuia fe honghei khan a thil nei an irûk pêk a; A vêla om mihei khan an nuiso tâk a.

⁴²Ama doituhei chu nen rât a, Â râlhei murdi chu nen lôm tâk a.

⁴³A khandaihei chu mangmunboin ni siam pêk a, Risual bualah khan ani chu irât rang phal khâi mak che a.

⁴⁴A roinpuina chu a kut ata ni khâi pêk tâk a, A rêngṭhungmun chu rinêngah nen lîr pêk tâk a.

⁴⁵A tlangvâl lâi sûnhei chu nen tôi pêk a; Ani chu mualinphoina nen rikhû tâk a.

⁴⁶O PUMAPA, ni irbîk kumkhua rang mani? Itena sôt im ni ningthik chu mei angkan ai chok rang?

⁴⁷O PUMAPA, ki ringna a tôizia remai inla; Miriam naihei murdi hi â fam theia nî siam a nit iti remai roh.

⁴⁸Tu miriam ngân im thina mêl mu loia â ring mai rang? Mi thi khua thuneina ata a ringna â sanisua thei rang?

⁴⁹PUMAPA, tianlâia ni lungkhamlianna neh ni iamomna, Davida zianga ni înkunghei khah, Taktiang im ai om tâk?

⁵⁰O PUMAPA, ni bôi hih an musit iti ringil no roh, Nam irât takhei murdi sîrinsiatna ki tonga ki tuang tlia hi.

⁵¹O PUMAPA, nangma doituhein ni riak inrithu hi an musit a, A fena tinah an nuiso ngai hih.

⁵²PUMAPA chu kumkhuakan inpâk rei. Amen, Amen.